Ei visuell revejakt
Reven er kanskje eitt av dei mest kjende villdyra i Noreg, men vi kjenner han kanskje betre frå kulturen enn naturen. No har det kome ei ny bok kor vi blir kjende med Mikkel i det naturlege elementet sitt.
– Boka er eit portrett av reven – både dyret av kjøtt og blod og dyret vi kjenner frå forteljingar. Ein kombinasjon av natur- og kulturhistorie, seier forfattar Andreas Tjernshaugen til Nynorsk pressekontor.
Boka har fått tittelen «Reven. Portrett av et villdyr» og kjem ut på Kagge forlag i mars. Tjernshaugen trur boka passar for alle og spesielt for dei naturinteresserte.
– Eg håpar å nå breitt ut. Eg har ein ide om at det å kikke på ville dyr kan vere ein aktivitet mange kan ha glede av. Jakt er ein etablert hobby, men å sjå på ville pattedyr er ikkje ei utbreidd fritidsinteresse. Eg håpar fleire får auga opp for den aktiviteten, seier han.
Reven er tidleg oppe
Tjernshaugen er utdanna sosiolog og har heilt frå barnsbein av vore interessert i dyr og natur. Det var òg litt av bakgrunnen til at det no blei bok om reven.
– Eg vaks opp som ein veldig naturinteressert unge og brukte mykje tid på å prøve å sjå ville dyr, men reven var ikkje å finne. Grunnen var ein skabbepidemi som hadde gjort bestanden av rev svært liten. Då eg i vaksen alder opplevde at reven plutseleg var der igjen og at ein såg meir vill rev blei eg meir nysgjerrig og bestemte meg for å gå ut for å finne reven i naturen, seier forfattaren.
I arbeidet med det som etter kvart blei bok har Tjernshaugen fått nærkontakt med reven fleire gongar. Han har òg nokre enkle tips på lager til dei som har lyst å finne Mikkel på eiga hand.
– Stå opp veldig tidleg i sommarhalvåret. Oppsøk eit skogbryn med utsikt over åker eller eng kor ein ser litt langt. Så er det berre å vente. Ein treng heller ikkje spesiell kamuflasje, tipsar Tjernshaugen og legg til:
– Men sitt så roleg som mogleg, og pass på at du har vinden mot deg, så ikkje reven kjenner lukta di.
Leiken og familiekjær
Tjernshaugen har òg fått fleire openberringar om reven i arbeidet med boka. Blant anna overraska det han kor leiken reven er.
– Eg såg blant anna vaksne revar leike med maten. Til dømes kunne dei fange ei mus, sleppe den laus igjen og jakta den ned på nytt. Eg er usikker på om det var rein leik og moro eller ei øving til framtidig jakt, fortel han.
– På eit anna tidspunkt såg eg ein rev aktivt yppe til krangel med ein råbukk, som er eit langt større dyr enn reven. Ved ein fysisk konfrontasjon vil råbukken vinne klart. Likevel yppa altså reven for å få råbukken til å jage seg.
I tillegg til å observere reven har Tjernshaugen lese mykje om dyret. Han trur eit anna element som folk kanskje kan bli overraska over, er kor «familiekjær» reven er.
– Reven jaktar aleine, men ei revetispe og kvelpane hennar er heilt avhengige av at far bringar mat til dei. Tispa er i hiet med ungane den første tida og då er ho avhengig av at far hentar mat slik at ho kan produsere mjølk.
Ikkje berre ein eventyrfigur
Tjernshaugen håpar boka hans kan vere med på å gi folk meir kunnskap om den ekte reven som dei fleste av oss har danna oss eit bilete av gjennom eventyr og forteljingar.
– Eg trur folk får eit litt anna inntrykk av reven etter å ha lese boka. Mange har nok lese og høyrt mykje meir om reven som ein eventyrfigur enn eit ekte dyr, så eg trur det er mykje å lære for dei fleste, avsluttar forfattar Tjernshaugen.
