– Eg har ikkje tenkt å gje meg med det aller fyrste
Salmediktaren Eyvind Skeie inviterer til salmekveld i Jondal kyrkje og Norheimsund kyrkje.
Både i Jondal 11. og i Norheimsund 12. oktober får han tonefylgje av musikarane Ulf Krupka på tangentar, Arild B. Nielsen på trompet og perkusjon og Stewart Barry på kontrabass. I Jondal er Jondal Grendekor med som forsongar.
Det opplyser kantor i Jondal sokn, Anne Karin Stormyr, i ei pressemelding.
Artikkelen held fram under annonsen.
Skeie er prest og forfattar, og ein av dei mest kjende nolevande salmediktarane, opplyser Krupka, som er kantor i Kvam. Salmar som En stjerne skinner i natt og Tenn lys er mellom dei mest kjende Skeie har skrive.
I Norsk Salmebok har Skeie skrive 55 tekstar, inkludert omsetjingar, opplyser han i ei pressemelding. Til saman har han skrive nær 2.000 songtekstar. Han har òg samarbeidd med mange komponistar. Då Skeie fylte 60 år, gav han ut si eiga salmebok med 316 salmar og songar. 5. november fyller han 75 år.
– Det er et privilegium å kunna reisa omkring også etter at ein strengt teke er pensjonist. Eg har ikkje tenkt å gje meg med det aller fyrste, seier han i pressemeldinga.
I Jondal er grendekoret arrangør. Vikøy sokn skipar til salmekvelden i Norheimsund.
