– Eg har alltid drøymt om å verta skodespelar
Då produsenten Kringle Film skulle laga tre korte filmar til ein MOT-kampanje, gjekk ei av hovudrollene til Mathilde Augestad (13).
Ho budde mange år i Ålvik, før familien flytta til Oslo i 2021. Den unge skodespelaren fortel at ho spelar hovudrolla i den eine filmen, og har mindre roller i dei to andre. Filmane fortel same historie sett frå ulike perspektiv.
– Eg spelar ein person som vert sett på som ein mobbar. Filmen der eg er hovudperson, fortel kvifor karakteren min oppfører seg som ho gjer, fortel ho.
Scenane med Mathilde vart spela inn i løpet av tre dagar tidleg i mai. Ho har sett filmen der ho er hovudperson, men ikkje dei to andre.
– Eg tykkjer filmen er veldig kul. Det var spanande å sjå seg sjølv på film, fortel ho.
For å få filmrolla, sende Mathilde inn ein såkalla Self Take. Self Take er ifølgje pappa Sveinung Augestad ein audition ein lagar sjølv.
Mathilde har litt skodespelarerfaring frå før. Ho var statist i kortfilmen «Satans barn», som vart spela inn i Bergen i 2017.
– Sidan har eg prøvd å få nye filmroller, og det klarte eg no. Det er veldig kjekt å spela i film, og eg har drøymt om å verta skodespelar sidan eg var lita jente, fortel ho.
Filmane, som er ein del av ein antimobbekampanje organisasjonen MOT står bak, skal visast på skular. Truleg vil om lag 70.000 elevar sjå dei.
