Drive-in-konsert med Gunslingers
Country-pop-bandet Gunslingers med kvammavokalist held drive-in-konsert i Vestlandshallen i Åsane fredag.
Bandet nyttar skjermen til Bergen Kino, og ein mann vil filma bandet medan det spelar. Folk sit i bilane og høyrer musikken gjennom opne vindaugo eller på FM-radio. Det er plass til 95 bilar i hallen per konsert, og det vert to konsertar. Laurdag spelar bandet i Stavanger.
Bandet var omtala i Bergensavisen onsdag. Elles vert det mykje Facebook-reklame, seier bandleiar Frode Måkestad frå Kvam.
Bandet har fem musikarar pluss teknikarar. Gunslingers kom i år ut med sitt sjuande studioalbum, og er mellom dei ti mest strøymde banda som syng på norsk i Noreg. Det daglege snittet er på 50.000 nedlastingar, ifølgje nettstaden til bandet.
Bandet omfattar Tore Mæhle på bass, Jan Ove Johansen på gitar, låtskrivar Frode Måkestad på vokal, Frode Andreassen på trommer og Dan Mikal Ripe Frøystad på pedal steel.
