Dramatisk læring

«Peer – ein gut på skulen min» er eit opplegg for alle 5.-klassingar i Kvam, arrangert av kulturskulen. Målet er at elevane skal få læra med kroppen – ikkje penn og papir.

Strømmen har reist rundt på skulane i heradet og jobba fem veker på kvar stad. Ho understrekar at kulturskulen skal vera for alle, og at prosjektet fungerer som eit gratis dagtilbod.

– Det er ikkje alle som har tid eller råd til å vera med på aktivitetar på kvelden, forklarar Strømmen.

Oppslukte av forteljinga

Ein gong i veka har 5.-klassingane samlast for å læra meir om Peer Gynt. Historia om den fiktive figuren er skriven i 1867 av Henrik Ibsen, og vert rekna som eit nasjonalt hovudverk. I byrjinga av kvar økt får elevane høyra ein episode om livet til Peer, formidla av Strømmen.

– Eg gler meg alltid til onsdagar, for då eg får høyra neste del av historia, fortel elev Tiliah Kvitastein Wilhelmsen.

– Det er kjekt å sjå at borna er så entusiastiske og blir heilt oppslukte av forteljinga. Dei fleste kan nok meir om Peer Gynt no enn kva foreldra deira kan, seier ho.

– Det er ei spanande historie! Eg har lært masse, blant anna at songen I dovregubbens hall opphavleg vart skriven til skodespelet Peer Gynt, fortel elev Sondre Flemmen Skogvoll.

Teater utfordrar

Etter historiebolken er det elevane sjølve som skal i aksjon.

– Me nyttar ulike former for teater, og elevane lærer mellom anna å bruka kroppane sine for å formidla ei historie, forklarar Strømmen.

Elevane har prøvd seg på fleire teaterøvingar, til dømes Doble følelsar. To og to går saman og skal demonstrera ein person med motstridande kjensler. Øvinga er ein favoritt hos fleire, og tiåringane kan kjenna seg att i å ha ulike kjensler på ein gong.

Gjennom slike oppgåver vert elevane kasta ut i nye utfordringar. Dette gjer at dei vert tryggare både på seg sjølve og på klassekameratane. I tillegg til mykje leik og moro dukkar det opp fine refleksjonar i ny og ne.

– Eg trur «Bøygen» er eit ekko av baksnakking, sa ein av elevane.

Aktuelt tema

Forteljinga er skriven på 1800-talet, men tematikken er like aktuell i dag.

– Eg ser Peer Gynt i mange av borna eg møter. På same måte som den fiktive figuren prøver dei å passa inn, samtidig som dei vil finna seg sjølve, seier Strømmen.

I dagens samfunn skal du ikkje vera «for mykje», har ho inntrykk av. Ungar vert haldne tilbake av både vaksne og kvarandre, og dei skal passa inn i ein A4-mal.

Strømmen slår fast at alle treng kjærleik og å bli sett for den dei er. Ei av oppgåvene elevane har fått, er å gje kvarandre kompliment. Ein og ein går fram og legg handa si på skuldra til ein klassekamerat, følgt av gode ord om eigenskapar eller personlegdom. Poenget er å snu kommentarar frå nedbrytande til oppbyggjande.

«Learning by doing»

Opplegget med Peer Gynt har vore ein stor suksess, stadfestar både Strømmen, lærarar og elevar.

– Dette har blitt min favorittime i veka. Eg klarar nesten ikkje venta til neste gong, fortel Sondre Flemmen Skogvoll.

Andre seier seg einige, og håpar på fleire slike prosjekt i skulen.

– Me har lært forskjellige teaterformer, songar, dansar og oppvarmingsøvingar, seier Wilhelmsen.

Fleire av jentene slenger seg ivrig med for å demonstrera både song og dans som har blitt ein del av livet utanfor klasserommet.

– Dette prosjektet er eit eksempel på godt samarbeid mellom kulturskulen og skulen. Opplegget er tverrfagleg, og me blandar inn til dømes norsk, musikk, geografi og samfunnsfag, seier Strømmen.

I tillegg får elevane ein trygg arena med eit underliggjande fokus på livsmeistring og psykisk helse. Strømmen har stor tru på drama som læringsform, og vil gjerne ha meir av det inn i undervisningsopplegget.