– Det var ein ekstra fin klang i Vikøy kyrkje

Veijr består av Ingrid Standal Sørheim på toradar, Vidar Seljen Høydal på gitar og kona hans Eir Seljen Høydal på vokal.

Om lag femti personar var samla i kyrkja. Benkeradene var fylte med alt frå ein nyfødd baby til godt vaksne. Veijr fekk god respons frå publikum då dei framførte alt frå sørgjesong til dei lukkelegaste slåttar.

Etter konserten sa Sørheim at det var moro å sjå mange kjende andlet i publikum. Eir Seljen Høydal var spesielt nøgd med konsertlokalet.

– Det er alltid kjekt å spela i kyrkjer. Det var ekstra fin klang i Vikøy kyrkje, seier ho.

– Byggjer bru

Trioen vonar å skapa eit musikalsk rom der ein får kjensla av at musikk kan nå inn der ord ikkje kan.

– Eir, med sin musikkterapeutiske bakgrunn, byggjer ei bru mellom oss og publikum og dei som elles lyttar til musikken vår. Det ufarleggjer oss og inviterer publikum inn, fortel ektemannen til Eir, Vidar.

At konserten var i kyrkja i Vikøy, var ikkje tilfeldig. Sørheim fortel at ho har halde fleire konsertar der, mellom anna i 2018. Då spela ho saman med fiolinist Hanna Thiesen. Opplevinga var så fin at ho ynskte å gjera det fleire gonger, fortel ho.

Resten av trioen tykte det var stas å besøkja Sørheim sin heimstad.

– Det var fint få sjå med eigne auge kvifor me skulle spela akkurat her. Kyrkjerommet er jo ein plass der folk samlast både til glede og sorg. Det passar fint til musikken me spelar, fortel Vidar.

Duo vart trio

Historia til Veijr går attende til byrjinga av 2020, då ekteparet Seljen Høydal byrja å spela saman. Ein mørk og kald haustkveld same året vart Sørheim spurd av Eir om å vera med.

– Eg øvde på eit øvingsrom på Griegakademiet. Plutseleg banka det på døra, og ei ukjend jente kom inn. «Dette er eit litt rart spørsmål, men har du lyst til å vera med i bandet mitt?» spurde ho. Eg sa ja med ein gong, fortel Sørheim.

Ekteparet forstod raskt at dei trong Sørheim for å få det musikalske uttrykket dei ynskte seg. Tekstar om jordnære og kvardagslege ting som folk kan kjenna seg igjen i, og viser i folkemusikalsk drakt, smelta saman då to vart til tre.

Kvemmingen fortel at ho er van med å spela tradisjonell folkemusikk. Ho tykkjer det er spanande å bruka toradaren i nye samanhengar og mot nye sjangrar.

– Ingrid forstod kva me ville. I starten av samarbeidet spela ho til ein låt Vidar og eg hadde skrive. Framføringa hennar fekk meg på gråten med ein gong, seier Eir.

Inspirasjonskjelder

Trioen fortel at dei har vorte inspirerte av andre artistar, men også av kvarandre. Eir fortel at songlæraren hennar på Griegakademiet, Berit Opheim, har vore ei stor inspirasjonskjelde. Tekstane som er skrivne av Vidar, har henta inspirasjon frå andre stader.

– Eg er oppvaksen med å høyra historier frå familien — det å berre sitja rundt kjøkenbordet og lytta til nokon som fortel ei historie med innleving. Eg er sikker på at det berre er 20 prosent av det eg har høyrt, som er sant, seier Vidar og ler.

Musikk som livsstil

Musikken tek mykje av tida til alle tre. Sørheim seier at det har vore mange konsertar, festivalar og kappleikar i tillegg til arbeid det siste halvåret. Ekteparet Seljen Høydal er båe i full jobb, men fortel at all tid som vert til overs, vert nytta til musikk. Dei legg heller ikkje skjul på at det gjeld også økonomien. Dei fortel at dei førre veke investerte i ei hardingfele kjøpt av felemakar Ole Gjerde i Strandebarm.

Trioen har nyleg spela inn to nye singlar. Veijr brukar det nye studioet til Vidar Berge i Strandebarm. Til våren vonar gruppa å gje ut eit album med låtane som vart spela på konserten i Vikøy.