Det strøymer på på 17. mai

Her skal ho ha med mange kunstnarar med tilknyting til Hardanger.

Riber har invitert 30 kollegaer innan fleire uttrykk, og i skrivande stund har 16 takka ja. Kwestan Jamal Bawan, Geir Botnen, Merethe Gauden, Arnhild Litleré, Maria Digranes, Knut Hamre og Reidun Horvei vert med. Dei fire fyrstnemnde har tilknyting til Kvam. Riber har sett eit tak på 20 deltakarar.

Innslaga vert filma på førehand, med to konferansierar: Ragnhild Margrethe Gudbrandsen og Helge Jordal.

Det vert lagt opp til ei betalingsordning som vert fordelt på dei medverkande kunstnarane.

– Me vonar på litt gjevarglede på ein slik dag, seier Riber.

– Stor variasjon

Alle hardangerkommunane er representerte. Det vert både fleirstemd song, kyrkjeorgel, hardingfele, biletkunst og piano.

Det vert ei lita markering i sosiale medium når klokka er 10, som ein offisiell start på dagen i Eidfjord. På kaien der vert det flaggheising, song med Ja, vi elsker og Bryllupsdag på Troldhaugen. Så kjem ein forsmak på hovudsendinga, som startar klokka 17. Sendinga varar i alle fall ein time. Det kjem an på kor mykje stoff som kjem inn, fortel pianisten.

– Det vert stor variasjon. Mange av dei godt etablerte kunstnarane synest dette er fantastisk å vera med på og eit kjempeflott tiltak for heile regionen, seier ho.

I normale tider ville mange av kunstnarane hatt mange oppdrag på til dømes 17. mai. Rieber freistar få dei lokale aktørane på banen når mange har mista alle oppdrag.

– Det er ein flott måte å visa regionen vår på, seier Riber.

Det gjeld også utanfor landegrensene. Programmet vert sendt også i USA, via «The Norwegian American Newspaper», som ifølgje Riber skal trykkja ein artikkel om tiltaket. Avisa er tilknytt mange norske losjar med norskamerikanarar som feirar 17. mai like ivrig som oss. Det er eit viktig publikum for kunstnarane.

– Har alle føresetnader

– Ein slik dag har Hardanger alle føresetnader for å visa seg frå si beste side. Me har fantastiske utøvarar, seier Riber.

Innslag vil verta strøymde frå Kinsarvik, Eidfjord, Djønno, Folkedal, Ystås, Norheimsund og frå hardingar som ikkje kjem seg heim – éin i København, éi i Trondheim og éin i Bergen. Kunstnarane skal visa kvar dei bur og den finaste utsikta dei har å by på. Det er ein måte å sameina heile hardangerregionen på.

– Me vonar folk vil sjå på sendinga og heia på oss, seier Riber.

Ho har tidlegare strøymt videoar med musikarkollegaer frå mellom anna USA, Sør-Afrika, Sør-Korea og Tyskland. Seinare kjem innslag frå Danmark og Italia. Det har kome levande bilete frå 11 stader, og tre nye stader kjem til. NRK har laga eit innslag om dette.

Det har vore eit lyspunkt for oss, det å bryta einsemda, seier Riber til NRK.

17. mai vert avslutningsproduksjonen.

– Ein skikkeleg festkonsert på slutten, seier Riber.

Internasjonalt kjend

Riber sit i kunstnarorganisasjonen Harding Puls og kjenner fleire av kunstnarane i Kvam.

Ho har fått internasjonal merksemd for poetisk lidenskap og meistringa av klaveret. Ho har ein bachelor i musikkvitskap frå Universitetet i Oslo, ei utdanning i klassisk piano frå ein høgskule i Hannover i Tyskland og ein bachelor i klassisk piano frå Noregs musikkhøgskole. Ho har hatt ei rekkje oppdrag som solist og kammermusikar.

Repertoaret til pianisten strekkjer seg frå barokk til samtidsmusikk, og ho utforskar stadig nye verk og ulike konsertformer. Riber har òg markert seg som komponist og kulturell entreprenør, og har leia fleire prosjekt på nasjonale og internasjonale arenaer.