– Det liknar litt på Øystese
Eit måleri som truleg vart måla rundt 1870, kan syna ei nybygd Øystese kyrkje.
Oljemåleri «Fjordlandskap» av målaren Reinholdt Boll er for tida til sals hos Blomqvist Nettauksjon AS. Måleriet syner ei lita bygd med ei kyrkje. På baksida av biletet har ein ukjend person skrive «Øistese?» på ramma med kulepenn.
Diis Bøhn tipsa HF om måleriet. Ho hjelper eigarane med å selja dette og eit anna måleri av Boll. Ho seier ho tykkjer biletet likar litt på Øystese. Bileta vart gjevne i gåve til syster til Boll. På baksida har kunstnaren skrive ei helsing datert 1871. Kyrkja i Øystese stod ferdig i 1868. Om biletet syner Øystese, kan det med andre ord vera av ei splitter ny Øystese kyrkje.
Ifølgje Norsk kunstnerleksikon var Reinholdt Fredrik Boll ein norsk målar som vart fødd i Stavern i 1825. Han levde til 1897. Han reiste mykje rundt til fots og er kjend for å ha måla sjø- og kystbilete frå Noreg og Island.
Etter at denne saka vart publisert, har Blomqvist Nettauksjon oppdatert eiga nettside. Ifølgje nettsida syner biletet Dale i Luster.
