– Det kjennest urettvist
Trommeslagaren til artisten Aurora, Sigmund Vestrheim frå Øystese, vert ikkje å sjå på turneen hennar i Mexico.
Grunnen er tryggleiksomsyn etter at han har fått mot seg skuldingar om nazi-sympatiar. BA skreiv om saka fyrst.
Vestrheim vart skulda for å vera høgreekstrem etter ein konsert i Brasil. Det heile byggjer, ifylgje Aurora og Vestrheim, på ei stor misforståing.
Skuldingane kom etter at han hadde gjort eit teikn med fingrane som nokre assosierer med «kvitt overherredøme».
– I vår populærkultur betyr dette teiknet «perfekt/bra». Eg visste ikkje at det også betydde noko anna, forklarar Vestrheim til BA.
I tillegg har nokre reagert på at Vestrheims instagram-namn inneheldt tala 777. Det forklarar han med si tilknyting til plateselskapet «777». Vestrheim fortel at han ikkje visste at desse tala også vert assosierte med høgreradikalisme av nokre.
Vestrheim fortel til Bergens Tidende at situasjonen vert opplevd som absurd, skremmande og uventa.
– Det er utan tvil noko eg aldri hadde trudd at eg skulle måtta oppleva, seier han til BT.
– Eg følte meg makteslaus, og det kjendest urettvist å verta skulda for noko så drygt når eg absolutt ikkje har noko som helst å gjera med det, seier Vestrheim til BA.
– Sigmund støttar definitivt ikkje desse vonde høgreekstreme meiningane. Han er ein av dei snillaste personane eg har møtt, skriv Aurora, ifylgje BA.
