– Det er så kjekt å få dette til!

Fyrste dansekveld i Innstranda Grendahus var i oktober. Det vart arrangert fire dansekveldar før jul. Om lag tjue personar deltok kvar gong. Det var godt nok grunnlag for å halda fram, fortel Anne Berit Ugletveit.

Innstranda Swing & Rockeklubb står for tilstellinga. Anne Berit Ugletveit, ektemannen Heine Ugletveit og Arve E. Kolltveit er pådrivarar.

Kvar tredje torsdag kan ein koma og vrikka på dansefoten. Det er sett opp tre dansekveldar før påske. Anne Berit fortel at ho og pådrivarane ynskjer å halda fram med dansekveldar også etter påske.

Realiserte planane

Ekteparet Ugletveit fortel at dei hatt tankar om å få til ein arena for dans i lang tid. Då dei flytta frå Oppdal til Ugletveit i 2017, ynskte dei å halda fram med hobbyen. I samarbeid med Kolltveit har dei omsider fått realisert planane sine.

Anne Berit meiner det manglar dansearenaer i Kvam. Difor synest ho det er stas å kunna by opp til dans i Innstranda Grendahus.

– Eg har sakna eit dansetilbod med fleire dansar enn gamaldans. Difor er det så kjekt å få dette til, fortel ho.

Anne Berit påpeikar at det er stort aldersspenn blant deltakarane. Torsdag var eldste deltakar 71 år, medan dei yngste var i starten av 20-åra, fortel ho.

Dottera til ekteparet Ugletveit, Iselin Ugletveit (24), og Frida Grøtt (23) var to av dei yngre deltakarane torsdag.

– Eg elskar å dansa swing! fortel Grøtt.

Iselin Ugletveit fortel at ho vart «tvinga» med av mora fyrste gong det vart arrangert dansekveld. Etter det har ho delteke av fri vilje.

Godt oppmøte

Anne Berit fortel at døra er open for alle som vil dansa. Ein treng ikkje å koma med partnar i handa. I salen er det alltid nokon å dansa med, seier ho.

Kvar deltakar betalar 50 kroner i døra. Om tjue personar deltek, er det akkurat nok til å dekkja husleiga, fortel ho.

Ho understrekar at dansekveldane ikkje vert arrangerte for å tena pengar, men for å skapa eit dansemiljø. Ho seier at mange av deltakarane har reist langt for å delta.

– Her er det deltakarar frå heile strekninga frå Ålvik til Mundheimsdalen, fortel ho.

Dansekveldane er ikkje eit dansekurs, påpeikar Anne Berit. Det vert ikkje gjeve instruksjon i trinn eller dansesjangrar.

– Her er det berre å møta opp, så lærer me av kvarandre, påpeikar Anne Berit.

Vil lokka fleire unge

Ekteparet Ugletveit fortel at det har vorte fleire unge deltakarar. Dei håpar at fleire unge vil ta turen innom.

Heine meiner at fleire unge hadde hatt godt av å koma seg ut og dansa. Om dei unge får danseglede, kan dei møtast for å dansa i staden for å drikka alkohol, påpeikar han.

Anne Berit har høyrt fleire unge fortelja at dei må drikka for å kunna dansa, og at dei dansar betre når dei er fulle. Ho har erfart at det ikkje er tilfellet.

– Dei dansar mykje dårlegare når dei er fulle, dei berre veit det ikkje sjølv, påpeikar Anne Berit.

Ekteparet og Arve E. Kolltveit håpar at marknadsføring i sosiale medium, og det at ryktet går, vil medverka til at fleire kjem innom og vrikkar på hofta.

– Dansetilbodet her er unikt. Det finst ikkje eit liknande tilbod i kommunen, påpeikar Kolltveit.