– Det er klart ein slik komponist fortener å verta lyfta fram
Hardingtonar tjuvstarta torsdag, men i kveld fann den offisielle opninga stad.
Formalitetane tok ordførar Torgeir Næss seg av, medan Bergen Filharmoniske Orkester tradisjonen tru serverte dei musikalske innslaga.
Som seg hør og bør på ein festival som ber namn etter eit av hovudverka til komponisten frå Kvam, stod eit opningsverk med musikk skriven av Geirr Tveitt (1908–1981) fyrst på programmet. Etterkomarane hans, mellom andre dottera Gyri, kunne fylgja og applaudera frå orkesterplass.
Sidan fekk BFO, 110 i talet, selskap av den verdskjende fiolinisten James Ehnes frå Canada. Saman framførte dei konsert for fiolin og orkester, opus 33, av Carl Nielsen. Etter ein pause heldt BFO fram med Vårofferet av Igor Stravinsky.
– Det er litt av eit program me har i vente, sa festivalleiar Geir Botnen då han ynskte gjestene velkomne til festivalopninga.
Ordføraren i Kvam trur mange har sakna Hardingtonar, som ikkje har vore skipa til sidan 2019. Sjølv lyttar han stundom til Tveitt-musikk.
– Det er musikk eg vil påstå kan treffa alle. Det er så mange spenn i musikken til Tveitt. Openbert frå det tradisjonelle til det moderne, og frå det folkelege, vakre og vare til det eksentriske, brålynte og ville. Mellom det morosame og det nesten skremmande. Innan det same minuttet kan ein ta seg i å nyta både det som er «nynnbart» og fint, før ein kvekk i stolen og til slutt flirer litt. Det er klart ein slik komponist fortener å verta lyfta fram, sa Torgeir Næss, som ikkje uventa bad festivalgjestene «ve no velkomne med æra!»
Hardingtonar held fram med i alt seks konsertar laurdag og sundag.
