— Det er Bygdalarm-stemning, trass alt

— Stemninga er veldig god, sjølv om folk må sitta på firarbord og ikkje kan flytta seg så mykje. Eg trur folk har vore klare for at det skulle skje noko. Det er kjekt å sjå at folk møter opp trass i smittevernreglar, seier Sørheim.

Når HF snakkar med henne i ein pause fredag kveld, slappar ho av i peisestova på Hardangerfjord Hotel, med utsikt til festivalområdet. Styret har førebudd seg på ulike kriser, men ingen har dukka opp så langt.

— Eg lurar nesten på kva eg skal gjera, for det går så greitt, seier ho.

∙ Sjå biletserie frå fredagen her.

— Bale å ikkje vita

Lenge lurte ein på om det vart festival i det heile. Då styret såg at det ikkje ville verta normale tilhøve, vart ein einig om at alternativet var noko heilt anna. Løysinga vart å alliera seg med hotellet i Øystese med minifestival i hotellhagen.

— Me måtte hiva oss rundt på slutten og hadde kort tid til å planlegga. Men festivalen har vorte arrangert sidan 2007, så heldigvis er mange drivne på organisering. Det hjelper godt på, sjølv om det er eit nytt område.

Ventinga og uvissa tidlegare i år var bale. Ein visste ingenting om korleis situasjonen ville vera til sommaren.

— Kvart møte har me lurt på: Skal me, eller skal me ikkje? Det er ikkje noko kjekt å skulla planlegga når ein har den uvissa. Til slutt tok me ei avgjerd, så måtte det bli som det blei, seier Sørheim.

Bygdalarm-stemning

Og bra vart det, synest ho. Området eignar seg godt, innramma av hotellet, Hardangerbadet og fjorden. Samarbeidet med hotellet — som står for mat og drikke — fungerer godt.

— Eg kjenner på Bygdalarm-stemninga, sjølv om det er annleis. Det håpar eg dei som er her ute gjer òg. Me har det viktigaste: nydeleg utsikt, fjord, fonn og fenalår, det grøne og gule, og hesene er på plass, seier Sørheim.

Nokre av artistane som opphavleg var booka til fjorårets festival, takka ja til å verta med i år. Andre er nye av året. Sørheim er nøgd med programmet.

— I kveld har me ein rockekveld; i morgon vert det meir country og folk. I går hadde me noko heilt nytt med Jon Hjørnevik. Han skulle me eigentleg ha på Påskelarm, men det måtte me avlysa, seier ho.

Varmt kveitebrød

På plenen framfor scenen får 200 personar sleppa inn. Dessutan kan 88 sitta på terrassen til hotellet. I tillegg er det plass til 64 på hotellromma med balkong mot festivalområdet.

Få har tinga hotellrom, men elles har det vore stor etterspurnad etter billettane. Laurdagen vart utseld med éin gong. Fredag var det nokre få billettar att.

— Me sat og følgde med då me sleppte billettane. Det såg ut til at folk sat klare til å kjøpa, seier Sørheim.

Folk har òg meldt seg som frivillige. Det trengst færre på eit mindre arrangement, men folk har vore positive og stilt opp, seier festivalsjefen.

— Folk synest det er kjekt at det skjer noko og melder seg for å vera med på å skapa liv i kommunen. Det er veldig positivt, seier ho.

— Det er digg å vera i gang igjen, sjølv om det er rart å måtta ta omsyn til smittevern, skyt Bygdalarm-veteran Ole Dominicus Storaas Ones inn.

— Det er rart å sjå folk sitta sånn som dette. Men me er eitt steg nærmare ei normal verd, og me håpar at me kan vera tilbake til neste år, seier han.