– Dei som ikkje er her, veit ikkje kva dei går glipp av

Åshild Egdetveit og Stine Mari Hansen har begge fått med seg alle utgåvene av Ålvikrock dei siste åra. Egdetveit fortel at ho har vore på kvar einaste utgåve sidan starten.

– Eg har vakse opp med og elskar Ålvikrock. Årsaka er musikken, stemninga og folka ein treffer, seier ho.

Hansen har vore publikum på alle utgåvene sidan ho flytta til Ålvik i 2010.

– Helga då Ålvikrock vert arrangert, er ei helg då dei vaksne får lov til å kosa seg. På Ålvikrock er folk blide og glade, og det er stort sett alltid god stemning, seier ho.

– Ukjent, men bra

Dag Rune Mo er ein annan Ålvikrock-veteran. Han fortel at han med nokre få unnatak har vore i publikum på alle utgåvene.

– Kva tykkjer du om Ålvikrock?

– Då må eg berre seia Tommy Vikdal! Han er leiar for dette og har levert kvart einaste år. Eg har ikkje høyrt om nokre av desse banda før. Likevel er dei heilt topp. Dette har vore ein kveld full av positive musikalske overraskingar. Kvar Tommy finn alle desse banda, må gudane vita. Dei som ikkje er på festivalen, veit ikkje kva dei går glipp av, seier han.

– Mykje positivitet

Festivalen starta på Storhaug torsdag. Der var det mellom anna innslag med Ålvik Musikklag, Ålvik Skulemusikkorps, elevar frå Kvam kulturskule.

Fredag og laurdag heldt festivalen hus i Folkets Hus. Heile 11 band stod på scenen i løpet av dei to dagane. Mellom dei var banda The Midnight Devils og Pretty Boy Floyd, som begge kom heile vegen frå USA.

Vikdal fortel at alle han har snakka med, har vore positive.

– Både artistar og publikum seier dei tykkjer det har vore kjempestemning. Det ligg liksom noko i lufta den helga det er Ålvikrock. Du merkar at det er ei elektrisk stemning i bygda. Eg trur alle i Ålvik set pris på festivalen, seier han.

– Har plass til fleire

Fredag vart det selt 150 billettar, medan det laurdag vart selt 200. I fjor var tala 127 og 217.

– Me hadde hatt plass til fleire. Det er mest publikum frå Kvam, men me hadde òg folk frå Voss, Bergen og Stavanger. Eg trur det er potensial for å henta fleire utanfrå. Kanskje burde me vore flinkare til å marknadsføra oss utanfor Kvam? seier Vikdal.

Neste år ventar ei ny utgåve av Ålvikrock.

– Me har allereie byrja planleggja neste festival. Den ser me fram til. Me har eit styre og eit apparat rundt oss som fungerer veldig godt.