Debuterer med tv-musikk
Vegard Markhus og Bjørnar Sangolt frå Norheimsund har laga musikk til ein ny tv-serie på NRK Super.
Dei to utgjer bandet Naboen min. Serien heiter «Mine ville venner» og handlar om Marte (7), som lever tett på dyra på besøksgarden Langedrag. Garden vart starta av oldeforeldra til Marte, og mamma, pappa og bestemora hennar arbeider der.
Ein musikkvideo vart lansert på nrk.no måndag 27. februar, og sjølve serien byrjar på barne-tv torsdag 9. mars.
Fyrste oppdrag på fjernsyn
– Dette er veldig stas. Musikken vår har vorte mykje spela på radio, men dette er fyrste gong me har fått oppdrag knytt til tv, skriv Sangolt og Markhus i eit straumbrev til HF.
Sangolt har i tillegg til kjenningsmelodien laga det han kallar kulissemusikk – snuttar som skapar ulike stemningar.
Dei vart kontakta direkte av regissøren av prosjektet, fortel Sangolt. Han hadde høyrt om Naboen min og høyrt musikken til duoen, og sa det hadde vore kjekt å få han med. Musikarane frå Kvam takka ja.
– Me fekk ei bestilling
Melodien skulle vera litt luftig og lett på foten. Dei to har skrive han i lag, og Markhus skreiv teksten. Melodien er ein idé som har lege i ein skuff i mange år, fortel Markhus. Då han og Sangolt vart spurde om å laga musikk til «Mine ville venner», skjøna dei at den melodien ville passa. Så har dei tilpassa han til barne-tv-formatet.
Det har vore veldig kjekt og spanande å samarbeida med NRK, fortel dei.
– Det er ein heilt annan måte å jobba på. Du sit ikkje med blanke ark og skal laga akkurat det du vil, du får ei bestilling om ein song som skal innehalda det og det, og ein tekst som må høva. Nytt for oss, men veldig spanande og kjekt, seier Sangolt.
– I vår ånd
Regissøren for serien meinte Naboen min kunne vera ein bra match til prosjektet. Det er dei svært glade for.
– Serien er i vår ånd, og eg trur eg ville ha likt han viss eg var liten, seier Markhus.
Han syng og spelar gitar til songen. Sangolt spelar alle dei andre instrumenta, bortsett frå trommer, som vert spela av Thomas Gallatin. Musikken har eit akustisk preg.
Sangolt har spela «ein haug med instrument», fortel Markhus. Noko vart brukt, og noko teke vekk. To lokale jenter – Lisa Hisdal og Melinda Isabella Zeng – var med og song på slutten av songen.
– Pengar styrer ikkje alt
– Var oppdraget godt betalt?
Sangolt ler.
– Det kjem an på korleis du ser på det. Viss du reknar timar, så er det elendig betalt og ikkje noko å skryta av. Ein tenkjer kanskje at NRK betalar greitt, men oppdraget gjekk ut på å skriva songen, arrangera han, spela han inn, miksa og «mastra» lyden. Det var ein stor jobb. Betalinga står ikkje heilt i stil med talet på arbeidstimar, seier Sangolt.
– Men det er litt kjekt òg. Det er ikkje pengar som styrer alt her i verda, heldigvis.
Spela inn i Øystese
Songen er spela inn i Guff Studio i bedehuset i Øystese, som Sangolt har bygt opp.
Duoen har fått tilsendt utklipp av serien, men har ikkje sett det ferdige resultatet enno.
– Det vert spanande å sjå, seier Sangolt.
Det finst ikkje mange slike jobbar, men Markhus og Sangolt vil halda fram med å laga musikk for born.
Dei to borna til Sangolt og dei tre til Markhus har ofte vore prøvekaninar og medhjelparar for musikken som Naboen min har laga.
Naboen min vann Spellemannprisen i klassen for barnemusikk med plata «Rockesock» i 2019.
