– De gjer dagen meir meiningsfull

Sundag ettermiddag vrimla det av spente ungdomar og ivrige arrangørar og hjelparar då årets UKM vart skipa til i idrettshallen. Timane før det heile braka laus, gjekk med til lydprøvar og andre førebuingar før publikum fekk sleppa inn.

– Føler meg fri

Ei av dei som deltok for fyrste gong, var 8.-klassing Elisabeth Vik. Sidan november har ho øvt på dansen som ho sjølv, med litt hjelp frå ein føresett, har laga koreografien til. Låten ho dansa til, var «anatomy» av kenzie.

Elisabeth fortel at ho har dansa sidan ho var seks–sju år gamal. For to år sidan byrja ho i dansegruppe, og ho er mest van med å dansa saman med andre. Då ho var på scena sundag, dansa ho derimot solo.

Før Elisabeth gjekk på scena, fortalde ho at ho var spent på korleis det ville vera å dansa åleine på scena. Det hadde ho aldri gjort før. Mest spent var ho på om ho ville klara å dansa utan å snubla, detta eller gløyma noko undervegs, men den unge dansaren hadde von om at det skulle gå bra.

– Kva gjev dansen deg?

– Når eg dansar, føler eg meg fri. Då tenkjer eg ikkje på noko anna. Om eg er lei meg, dansar eg. Då føler eg meg betre etterpå, seier Elisabeth.

Sjå fleire bilete frå UKM:

Heilt bananas

Eit anna innslag stod dei unge musikarane Kristian Nicolai Eiken-Aksnes, Gustav Sangolt, Tomas Sangolt og Dan Christer Byrkjeland for. Kvartetten utgjorde bandet Banan AS, som framførte sin eigen versjon av «Holy Mother» av Eric Clapton.

Sjølv om nokre av medlemane i gruppa er glade i bananar, er det ikkje det namnet kjem frå. Det dukka opp då dei snakka om det «å gå bananas», forklarar dei.

Tre av bandmedlemane – Kristian Nicolai på bass, Tomas på gitar og Dan Christer med song – har øvt saman torsdagar i om lag eit halvt år. Gustav, derimot, rakk å vera med på to øvingar før framføringa. Han spelar trommer, noko han har gjort i sju år. Trommisen, som går i 8. klasse, spela i eit anna band på UKM i fjor. Resten av gjengen, som går i 7. klasse, var alle debutantar.

Trass i at dei fleste i Banan AS ikkje har delteke på UKM før, var det lite nervar å spora. Dei unge musikarane fortel at dei er vane med å stå på scena og å framføra noko for andre.

– Eg er ikkje nervøs i det heile, sa Kristian Nicolai før dei skulle spela.

Ungdom presenterte ungdom

Også 8.-klassing Signe Vik og 7.-klassing Isa Emilie Eiken-Aksnes bidrog på scena, men dei korkje song, dansa eller spela instrument. Dei var konferansierar og hadde ansvaret for å presentera dei ulike innslaga. Det gledde dei seg til.

– I fjor var eg ikkje gamal nok til å delta, men eg såg på. Då syntest eg det såg veldig moro ut å vera konferansier, fortel Isa Emilie.

Jentene er nokså scenevane. Dei har mellom anna vore med på båe framsyningane til kulturskulen – «Tre nøtter til Askepott» og «Ei juleforteljing» – og andre arrangement. Heller ikkje dei var spesielt nervøse, hevda dei.

– Eg er litt redd for å seia noko feil, men det går sikkert bra, for publikum veit jo ikkje kva eg eigentleg skal seia, seier Signe.

I tillegg til å vera konferansier stilte Isa Emilie ut eit måleri i kunstavdelinga.

– Det er kult å stilla ut, seier ho.

Måleriet «Nattpels» var laga med akrylmåling, og viser ein katt som sit i eit tre i solnedgang. Kunstnarspira fortel at ho likar å måla overgangar frå lyst til mørkt, og at ho er glad i solnedgangar.

– Kos dykk!

UKM er eit arrangement for ungdom i alderen 13–20 år. Årets deltakarar bidrog med musikalske innslag, dans, kunst og dataanimasjonsfilm. I tillegg fotograferte to ungdomar – Alexander Nitter og Sondre Fagerheim Lunestad – både publikum og dei som var på scena.

Tidlegare har UKM vore ein konkurranse der nokre av deltakarane har gått vidare til ein regional konkurranse. Slik er det ikkje lenger, understreka arrangør Vidar Sangolt i Kvam kulturskule. Likevel var eit fagpanel på plass i salen. Det bestod av Vidar Berge, Ida Sørheim, Linda Lid og Stig Lundblad-Sandbakk.

– Ikkje bry dykk om kva andre måtte meina. Gjer det de har øvt på og kos dykk på scena! oppmoda Sørheim før det braka laus.

Etter at alle ungdomane hadde vore på scena, fekk dei som ynskte det, høve til å få ei tilbakemelding frå fagpanelet. Panelet skal dessutan setja opp ei liste over deltakarar som får spørsmål om å representera Kvam i ein fylkesfestival på Askøy i april.

Takka ungdomen

Ordførar Torgeir Næss i Kvam herad hadde ikkje høve til å vera til stades. Han dukka i staden opp på skjermen med ei digital helsing til deltakarane. Han sa at alle treng strukturar i livet, som å ha mat i magen, gode vegar og solide bygningar.

– Men desse strukturane må fyllast med noko. Elles går me berre rundt og pustar og eksisterer, sa Næss.

Ifylgje ordføraren er kultur det som fyller strukturane med innhald, liv og meining.

– De som deltek, gjer dagen meir meiningsfull for dykk sjølve, men også for resten av oss. Takk for at de engasjerer dykk i kultur! sa Næss.