Country på nynorsk

Littlarm, ein del av Bygdalarm-festivalen, skipar til ein konkurranse om å gjendikta tekstar av country-nestorane Dolly Parton og Johnny Cash. Det vert opplyst i ei pressemelding.

Vinnartekstane skal framførast av husbandet til festivalen med gjester i Norheimsund laurdag 1. juli. Littlarm lovar eit morosamt og uhøgtidleg arrangement.

Deltakarane får stor fridom. Det viktigaste er å fanga opp stemninga og bodskapen i teksten, og ein må gjerne tilpassa han til norsk samtid. Verselengd og rytme må vera intakt og flyten god. Teksten skal vera nynorskbasert eller på dialekt.

Ein jury av forfattarar, musikarar og representantar frå arrangørane skal kåra ein vinnar og to delte andreplassar.