Byr på blanda musikkdrops

Konserten vert den fyrste av fem frå haustprogrammet til Lydia Forum for Levande Musikk i Kvam.

Petter Folkedal, Piddi Fjeldstad og Frode Unneland spela tidlegare i bandet Evig Din For Alltid, saman med no avdøde Frank Hammersland. Dei tre har hatt solokarrierar i mellom anna Sergeant Petter, Savoy og Pompel & The Pilts. Trioen skal spela strippa versjonar av songar frå eigne katalogar.

– Me håpar å gje publikum gode musikalske opplevingar, med flinke musikarar, seier Hogne Høysæter, styreleiar i Lydia.

– Modernistisk eksperiment

Arrangøren skipar til konsertane på dagtid laurdagar, slik at det skal passa inn i tidsplanen for flest mogeleg. Arrangementa plar freista mellom 30 og 60 tilskodarar.

– Det er ikkje lett å treffa dei yngste, sjølv om me har rabatterte billettar for dei. Me vil gjerne ha tips om nokon veit korleis me kan knekkja den koden, seier Høysæter.

Musikk i varierte sjangrar vert framført, men hovudvekta er på jazz, blues og rootsmusikk. Nokre av artistane tilbyr seg å koma for å spela, medan arrangøren vert tipsa om andre. Kvart halvår ynskjer Lydia å visa fram artistar med lokal tilknyting.

Sundag 13. oktober riggar Lydia til konsert med Symre Taugbøl Bang. Høysæter er spent på om tidspunktet for konserten påverkar kor mange som kjem. Konserten med Symre er nemleg den fyrste som vert arrangert på ein sundag.

Musikken hennar blandar jazz, folk, rock, pop og vise, ifylgje Dag Rune Mo, som har ansvar for å tinga artistane. Tekstane er skrivne på dialekt, og nyttar humor som verkemiddel. I oktober gjev ho ut plata «Elles ganske frisk».

– Eg gler meg mest til konserten med Symre. Det er spanande med plateslepp og ho skil seg ut med sitt modernistiske eksperiment, seier Mo.

Gladjazz og julejazz

Seinare i oktober går Vika band på scena med sin gla´jazz. Høysæter sitt høgdepunkt kjem til Kvam 9. november. Tom Roger Aadland feirar tjue år som artist med albumslepp og turné. Han har skrive låtar for mellom anna Hellbillies og Vamp. Han har òg omsett songar frå Bob Dylan til teaterstykket «Dylan på norsk».

– Ikkje kven som helst får røra songane til Dylan. Det er eit kvalitetsmerke, seier Høysæter.

Det er tredje gong Lydia inviterer til konsert med Aadland. Denne gongen er han aktuell med sitt nye album «Lysvandring». Konserten er ein av førti på turnélista hans.

Konserthausten vert avslutta med julejazz, som har femårsjubileum i år. Sandven Jazz Kompani skal då framføra jazzifiserte julelåtar, fortel Mo. Vokalist vert i år, som i fjor, Anne Cathrine Eiken frå Kvam. Ho er mellom anna kjend som rektor ved Kvam kulturskule.

– Programmet er litt sært, men me treffer eit litt vaksnare publikum, seier Mo.