Bygde «kjensle-møblar» i Ålvik
To uvanlege stolar har dukka opp i Ålvik. Den eine blinkar lurt til deg, medan den andre er forskrekka.
Stolane, som vert kalla emojistolar, er teikna og laga av designar Hans Pulles. Han fortel at stolane er ein del av ein kolleksjon på ti gatemøblar som alle er inspirerte av emojiar. Dei to stolane i Ålvik er inspirerte av emojiane Blink og OMG.
Stolane er laga av metall som er galvanisert og pulverlakkert. Pulles eig stolane, men dei er laga med stønad frå kraftfondet i Kvam.
– Sidan eg lagar stolane sjølv, har eg brukt all stønaden til materialar. Det gjorde det mogleg å laga to stolar i staden for éin, fortel Pulles.
Kan vera på flyttefot
Begge stolane står i dag ved parkeringsplassen til Elkem Bjølvefossen. Det har dei gjort sidan dei vart monterte laurdag 13. mai. Pulles kan ikkje lova at stolane vert ståande i Ålvik.
– Ein av grunnane til at eg laga desse stolane, var at eg skulle ha noko å stilla ut. Tanken er at dei skal reisa rundt. Det kan vera at dei vert flytta til ein anna stad, og det kan henda dei kjem attende til Ålvik etterpå, seier han.
Blink-stolen i Ålvik er ikkje den einaste i sitt slag. Den har ein søsterstol med ein litt annan farge ved Olav H. Hauge-senteret i Ulvik. Den vart sett opp i 2021.
Kva dei som ønskjer eit emojimøbel, må ut med, er hemmeleg.
– Eg har ikkje lyst til å ha prisen i avisa. Dei som er interesserte, kan kontakta meg. Stolane er ganske dyre. Det skuldast mellom anna at dei er laga av dyre materialar og at dei er tunge og vanskelege å flytta. Stolane er laga for å vara. Kjøper ein eit slikt møbel, kan det opplevast av fleire generasjonar, seier Pulles.
Likar reaksjonane
Pulles bur i Kunstnarhuset Messen og har difor gode moglegheiter til å studera korleis publikum reagerer i møte med «humørstolane».
– Eg ser at nokre er usikre på om det er lov å sitja på dei. Eg ser òg at mange utforskar stolane med hendene. Det tykkjer eg er interessant. Metall er gjerne noko hardt og kaldt som ein ikkje vil ta på, men eg ønskjer at mine verk skal invitera folk til berøring, fortel han.
Dei som ønskjer å sjå fleire emojiinspirerte gatemøblar, vil få høve til det til hausten. Då skal modellar og animasjonar som som syner heile kolleksjonen, stillast ut i Messen.
