Bygdaslaur på heimebane

Det er kaffi som er i koppen når Frode Måkestad frå Tørvikbygd set seg ned ved kjøkenbordet for å ta ein prat. Klokka er 21.40. Det er palmelaurdag, og det nærmar seg konsert igjen. Tidlegare i år har Måkestad og bandet hans Gunslingers fylt opp konsertarenaer både i Bergen, Stavanger, Ålesund og Flekkefjord. I kveld er det 700 personar i idrettshallen i Øystese som ventar på kvemmingen.

Med 16 år bak seg som artist er det mykje som går på autopilot ein konsertdag. Det er ein del praktiske ting som skal ordnast. Litt for mykje, meiner artisten sjølv. Nett denne konsertdagen har vore forholdsvis roleg.

Måkestad vedgår at han gjerne blandar seg opp i litt for mykje. Han likar å ha kontroll. Utanom det er det lite å finna av ritual.