Bygdapride fekk både ja og nei
Fargerikt Kvam får festa regnbogebanner og flagg langs fylkesvegen, men ikkje i rundkøyringane.
Organisasjonen har søkt Vestland fylkeskommune om løyve til å hengja opp banner og flagg langs fylkesveg 79 mellom Norheimsund og Øystese i perioden frå 26. mai til 3. juni. Fargerikt Kvam har også søkt om løyve til å ha prideparade i fylkesvegen laurdag 1. juni.
Fylkeskommunen seier ja til å festa banner og flagg langs vegen, men nei til å gjera det same i og 100 meter før og etter rundkøyringane.
Avslaget vert forklart med at veglova ikkje opnar for å hengja opp flagg i og nær rundkøyringar. Årsaka er at sjåførar må «behandla» mykje informasjon når dei køyrer gjennom ei rundkøyring. Alt som kan forstyrra sjåføren, kan bidra til trafikkfarlege situasjonar.
Fylkeskommunen stiller nokre vilkår: Bannera og flagga må ikkje hengjast slik at dei hindrar sikt til trafikksignal, kryss, avkøyrsler, trafikkskilt eller gangfelt.
Sykkelrittet Bergen–Voss vert arrangert 1. juni, medan Øystese Kiwi Bama cup vert arrangert frå 31. mai til 2. juni. Fylket krev at bannera og flagga ikkje skal vera til hinder for arrangørane eller deltakarane.
Fylkeskommunen seier ja til å bruka fylkesvegen til Bygdapride-paraden, men presiserer at det må skje med løyve frå eller i samarbeid med politiet. Skal vegen stengjast, må Statens vegvesen vedta det.
