Bygdalarm vart heidra for nynorskbruken
Kvam Mållag har gjeve Målprisen 2022 til musikkfestivalen Bygdalarm.
Prisen vart delt ut under siderfestivalen i Øystese laurdag. Utdelinga stod jurymedlem Ingunn Hildonen Teigland for.
Juryen grunngjev valet med at festivalen har ein gjennomført profil med den nynorske målforma i sentrum.
– Bygdalarm har sidan starten i 2007 vore med på å gjera nynorsk endå «kulare». Festivalen har ei relativt stor målgruppe og kommuniserer med publikum på ein levande måte. Spesielt rettar den seg mot ungdomar som gjerne står midt i eit val om kva språk dei skal nytta resten av livet. Bygdalarm gjer ein framifrå jobb med å visa kor kul og fin den nynorske målforma er. Me er stolte over Bygdalarm, og festivalleiinga har god grunn til å vera stolt over arbeidet sitt med festivalen, sa Teigland.
Festivalsjef Ida Sørheim og frivilligansvarleg Sigbjørn Rykkje tok imot prisen.
– Eg vil takka på vegner av oss to, heile styret og eigentleg alle som nokon gong har skrive noko for Bygdalarm. Språket er viktig for oss, og å få ein pris som dette betyr veldig mykje, sa Rykkje.
