Bygdalarm er i kjømda

Det sa festivalsjef Ida Sørheim då ho og sponsoransvarleg Arne Birger Øystese informerte om årets festival i eit møte i mars.

Mykje er på plass

Ifylgje Sørheim er mykje booka til festivalhelga som finn stad i Norheimsund fyrste helga i juli. Ho vonar at gjengen skal få til mykje av det same som han gjorde sommaren 2019.

– Mellom anna vert det klubb i både Straumen og Nistagato, fortel Sørheim.

– Og sjølvsagt vil me ha med den same, store diskokula, legg Øystese til.

Artistsleppet starta i desember. Då vart det kunngjort at både elektronikaduoen Lemaitre og rockebandet Bigbang vil vera å sjå på scena. I februar vart det stadfesta at gudbrandsdølen Synne Vo vil ta turen til bygda.

Bygdalarm si eiga bookingnemnd, som leitar etter artistar som passar festivalen og den musikalske profilen, har ein krevjande jobb, meiner festivalsjefen. Difor har nemnda eit samarbeid med nokre profesjonelle som tek seg av den praktiske delen av bookinga.

– På ein festival er ein avhengig av å ha god musikk. Difor hyra me nokon som kunne hjelpa oss med jobben, fortel Sørheim.

Styret planlegg også gratisarrangementet Badnalarm, som truleg vil finna plass på haldeplassen i Grova. Larm for dei minste byrja gjengen med då festivalen kom til Norheimsund. Øystese har mellom anna von om å få til eit «bollesamarbeid» med Baker Brun. Han tykkjer det er viktig at også barnefamiliar får oppleva ein del av Bygdalarm.

– Den årlege jakta

Medan mykje er ordna, er det framleis ein del som står att før alt er «spikra». Jakta på frivillige er ein av dei årlege kampane, ifylgje Øystese. Sjølv om ein del har meldt seg, treng dei fleire.

– Me er heilt avhengige av at folk engasjerer seg og ynskjer å bidra, seier Sørheim.

På det meste har det vore 280–290 frivillige som har bidrege til førebuingar og gjennomføring av festivalen. Øystese understrekar at det optimale er ein kombinasjon av unge og vaksne frivillige. Han meiner at dei vaksne fungerer som eit godt, roande element som mellom anna «trivselsvakter».

Etter to krevjande år der Bygdalarm i 2020 måtte avlysast og i 2021 vart ein minifestival i hotellhagen i Øystese, er gjengen litt meir spent enn elles når det gjeld det å skaffa mange nok frivillige.

– Det kan jo henda at det vert vanskelegare – at fleire ynskjer å vera publikum og få det med seg, men eg trur det skal ordna seg fint i år òg, seier Sørheim.

– Det har jo vorte eit større arrangement som er meir krevjande å gjennomføra. Men for mange, spesielt dei unge, kan det vera ei gulrot å få ein av dagane gratis når ein hjelper til, seier Øystese.

Eit så stort arrangement som Bygdalarm har vist seg å verta, krev engasjement, tid og energi. Fleire av dei som er med i styret, har vore med i mange år. Sørheim og Øystese fortel at dei kunne tenkja seg nokre nye, unge frivillige inn i organisasjonen.

– Det er viktig med både fornying og forynging – at me heng med i tida. Det er viktig at ikkje festivalen flyttar seg vekk frå kjernepublikummet på grunn av at me som jobbar med han, vert eldre, seier Øystese.

– Dugnad på høgt plan

Arbeidet med å skaffa sponsorar er godt i gang, trass seinkingar på grunn av pandemien. Øystese fortel at festivalen har ein del trufaste verksemder som har støtta han i fleire år, og at han har nokre langsiktige avtalar, mellom anna med Sparebanken Vest.

Banksjef May Turid Tømmervik ved Sparebanken Vest-kontoret i Norheimsund tykkjer at det er viktig å støtta opp om det born og unge held på med. Ifylgje henne har banken ein del pengar som skal attende til samfunnet. Ho nemner fleire grunnar til at festivalen får sin del av dei.

– Det er eit stort, lokalt engasjement som går føre seg på Vestlandet. I tillegg er me opptekne av dugnadsinnsatsen, og i Bygdalarm er det dugnad på høgt plan, seier Tømmervik.