Bukkar i bad lokka mange på kino

480 publikummarar løyste billett til den norske animasjonsfilmen «Bukkene Bruse på badeland». Dette gjer filmen til den mest sette i Kvam i 2023. Filmen vart vist fem gonger. To av dei var – giss kvar – i Hardangerbadet.

– Dette vart eit vellukka stunt. Den første av dei to framsyningane var utseld, og den andre nesten utseld, fortel kinosjef Mary Ann Sørheim.

Ho ser ikkje bort frå at kinoen vert med på fleire liknande utflukter seinare.

– Kvam kino viser gjerne film andre stader enn i kinosalen, dersom det er teknisk mogleg, seier Sørheim.

Liten nedgang

I 2022 vart det selt 4.538 billettar. I 2023 hadde talet gått ned til 4.456. Sørheim trur ho veit årsaka.

– I 2022 hadde me nokre skuleframsyningar. Det hadde me ikkje i 2023. Med skuleframsyningar hadde me truleg selt nokre hundre billettar ekstra, seier ho.

Korkje 2022 eller 2023 kan måla seg med 2019, det siste året før pandemien. Då selde Kvam kino 6.557 billettar.

– Denne trenden går att i heile landet. Eg håpar me i 2024 kan ta eit steg nærare tala frå 2019, seier Sørheim.

– Likar norske filmar

Den nest mest populære filmen vart «Den første julen i Skomakergata», med 435 billettar. På 3.-plass kom «Barbie» med 300 billettar. Fem av dei ti mest populære filmane er norske. Éin er samisk.

– Fleirtalet av dei mest populære filmane er barne- eller familiefilmar. Dette er ikkje noko nytt. Dei siste åra har filmar for heile familien vorte populære, fortel Sørheim.

Den norske filmen «Folk og røvere i Kardemomme by» klarte å verta blant dei ti mest populære i både 2022 og 2023. Ifølgje Sørheim skuldast dette at filmen gjekk både i romjula i 2022 og i januar 2023.

På botnen av filmlista ligg den britiske filmen «Love Again», som ingen ville sjå.

Godt år for klubb

Kvam Filmklubb hadde eit positivt år. For å sjå film, nå ein vera medlem.

Klubben synte 15 filmar i 2023. Størst var interessa for «After Yang», som vart sett av 46 medlemer. «The Quiet Girl» vart nest mest populær, med 42, medan 41 såg «Ferskenlunden i Catalonia».

Til saman såg 509 personar film i filmklubben i 2023. 386 personar såg dei 16 filmane klubben viste i 2022.

– Me prøver å syna filmar som kanskje ikkje vert viste på den kommunale kinoen. Filmane skal vera av høg kvalitet, og mange av filmane har vunne prisar på festivalar. Elles prøver me å laga varierte program både når det gjeld sjanger og opphavsland. Krigsfilm er det einaste me unngår, skriv klubbleiar Nick Christensen i ein e-post.

Nedgang i Strandebarm

Strandebarm er den einaste staden i Kvam som får besøk av Bygdekinoen. Filmane vert synte i ungdomshuset Haugatun. Ifølgje ei oversikt frå Bygdekinoen vart det vist 18 titlar i Haugatun i 2023. Til saman vart det selt 325 billettar. Mest populær vart «Den første julen i Skomakergaten», som selde 53 billettar. «Kampen om Narvik» og «Folk og røvere i Kardemomme by» vart nummer to og tre på lista med 42 og 37 billettar.

I 2022 vart det vist 17 titlar og løyst 519 billettar.

Siv Håbrekke er kinoansvarleg i Strandebarm Ungdomslag. Ho fortel at kinogjestene i Haugatun i ei årrekkje fekk sitja i gamle sofaer. Desse vart heiste ned frå loftet kvar gong det var filmframsyning. I haust vart sofaane bytte ut med vanlege stolar. Det kan ha fått konsekvensar.

– I alle fall har det vore færre publikummarar på filmane i haust. Om dette skuldast at folk saknar sofaane eller at dei har andre ting å bruka tid og pengar på mot slutten av året, er usikkert, seier Håbrekke.