Boltrar seg med fargar og perspektiv

Det går fram av ei pressemelding frå Kunstnarhuset Messen. Det er tredje året styret for kunstnarhuset kan invitera til nye opplevingar. Opninga byr på nye kunstverk i kunstparken og «Opne studio».

Parken utvidar i år med verk av kunstnarane Frank Åsnes frå Rogaland og Bart Nijboer frå Nederland. Dei har båe budd og arbeidd i Kunstnarhuset Messen i april.

Åsnes har måla ein påle han fekk frå Fykse Grendahus, der han var brukt til å rulla opp eit stort måleri av fjella i Fykse. Måleriet vart gjeve til Folkets Hus i Ålvik, og pålen donert til Kunsthuset Messen, der Åsnes fekk han. Han restaurerte han og måla han i eit abstrakt mønster. Fargane er dei same som er nytta på mange hus i Ålvik. Åsnes hengde pålen frå ei grein på eit stort tre i kunstparken. For å sikra han når det stormar, er pålen forankra i bakken, heiter det i meldinga.

Nijboer seier at då han fyrst kom til Ålvik, vart han fasinert av kor mykje perspektivet på naturen rundt vert forandra med endringar i vêret.

– Plutseleg kan fjella ha forsvunne, løynde av skyene. Eller vatnet kan få himmelen til å verka uendeleg, forvandla til ein spegel på ein vindstille dag. I arbeidet eg laga for Messen kunstpark ynskte eg å innlema denne transformative kvaliteten. Å lata han endra seg med vêret og samhandla med omgjevnadane, seier Nijboer i pressemeldinga.

Kunstnarhuset Messen arrangerer «Opne studio» ein gong i månaden. Det vert det også på fredag. I salongen kan dei besøkjande også oppleva den fargerike utstillinga til Åse Berit Skeie Ulltang, går det fram av meldinga.