Bokbåten kan verta nedlagd

Som plaster på såret tilrår han å etablera ei tilskotsordning retta mot interkommunale og kommunale tiltak som skal tilby bokutlån, til dømes bokbussar.

Bokbåten har reist berre i Hordaland, ikkje i Sogn og Fjordane. Dei to fylka er no slegne saman,

– Avtalen med leverandøren av tenesta gjekk ut våren 2020. Å halda oppe bokbåten inneber kjøp av ei teneste som aukar bokbåten sitt geografiske verkeområde til å dekkja heile Vestland, har universell utforming og har utsleppsfrie løysingar. Det er fylkesrådmannen si vurdering at det innanfor gjeldande rammer ikkje er rom for å vidareføre tenesta med slike krav utan at ein reduserer løyvingane til andre bibliotekføremål. Dette vil gå ut over det samla bibliotektilbodet og samarbeidet med dei kommunane der båten ikkje har stoppestader. Etter ei samla vurdering rår fylkesrådmannen til at bokbåttenesta vert avslutta og erstatta med andre utjamnande tiltak og ordningar på feltet, og som er gjeldande i heile Vestland fylke, skriv fylkesrådmannen i saksutgreiinga.

Saka vert drøfta av hovudutval for kultur, idrett og integrering i Vestland tysdag 19. mai. Fylkestinget avgjer 9. juni.

Den gjeldande avtalen med Vinnes skyssbåtservice AS i Fusa kan ikkje lengjast. Avtalen må difor lysast ut. Tenesta kan ikkje koma i gang att før våren 2021, meiner fylkesrådmannen.

Han stipulerer kostnaden med drift av ein bokbåt i heile Vestland til 2,35 millionar kroner i året, pluss kostnader med nye miljøkrav og universell utforming. Møre og Romsdal fylkeskommune har tidlegare droppa bokbåten, noko som reduserte stordriftsføremonene.

Utvals- og fylkestingsmedlem Terje Kollbotn (Raudt) har kjempa for bokbåten tidlegare, og lovar ein ny kamp tysdag. I budsjetthandsaminga i vinter vart avviklinga utsett til etter våren.

Bokbåtturneen i vår vart avbroten etter ni dagar på grunn av koronaviruset.