Blar opp for gode tekstar

HF er på jakt etter tekstar om lokalavisa. Rause premiar ventar dei beste skribentane. For dei som ikkje ønskjer å skriva, er ei skattejakt eit alternativ.

Det er ingen krav til sjanger. Alt frå dikt og drama til sakprosa og skjønnlitteratur vert akseptert. Skrivetevlinga har fått tittelen «HF 150 år». Det betyr ikkje at tekstane må handla om HF og historia til bladet.

– Tekstane må på ein eller annan måte vera relaterte til lokalavisa. Dei treng ikkje handla om HF, men kan godt spinna litt kring konseptet lokalavis utan at me er nemnde, fortel HF-redaktør Sigbjørn Linga.

– Det er heller ikkje naudsynt at det ein skriv om, har skjedd. Det er lov å dikta, seier dagleg leiar Kjellaug Camilla Skaar Ljones.

150-årsjubileet er ikkje den einaste årsaka til at HF oppmodar folk om å finna fram skrivesakene.

– Jon Fosse får nobelprisen på denne tida. Me tenkte dette er eit høve til å løfta fram nynorsken, fortel Linga.

– Berre nynorsk

Tekstar på bokmål vert altså ikkje aksepterte.

– Men skulle nokon senda inn ein tekst på eit anna språk som kan omsetjast til nynorsk, er me villige til å akseptera det, seier Linga.

Skribentar som ikkje kjenner seg støe i rettskriving, treng ikkje uroa seg.

– Dette er inga tevling i rettskriving. Me kjem til å retta tekstane før dei kjem på trykk, så sant det ikkje er opplagt at dei er meint å vera på dialekt eller slang, seier redaktøren.

Han oppmodar skribentane til å vera kreative.

– Mi erfaring er at det løner seg å vera personleg og å finna på noko originalt som skil seg litt ut frå dei andre tekstane.

Linga har ein fordom som går ut på at dagens unge er dårlegare til å skriva lengre tekstar enn tidlegare generasjonar, fordi dei les mindre og skriv meir i stuttform, gjerne på dialekt i ymse digitale kanalar.

– Mi von er at denne tevlinga kan prova at eg bommar stygt, seier han.

Pengepremiar

Forfattarane av dei tre beste tekstane får 8.000, 5.000 og 2.000 kroner. Tekstane må vera mellom 300 og 1.000 ord lange, og dei må vera HF i hende innan midnatt 20. desember. Vinnartekstane vert publiserte i jubileumsavisa 27. desember. Tekstar som imponerer, utan å nå pallen, kan òg koma på trykk.

Ordførar Torgeir Næss, biblioteksjef Ragna Helene Soldal, mållagsleiar Randi Jåstad, Linga og ungdomsalibiet Sara Fykse (18) skal vurdera tekstane. Linga lovar at han vert den einaste i juryen som kjenner identiteten til forfattarane.

Inviterer til skattejakt

Medan den uavhengige redaksjonen inviterer til skrivetevling, inviterer den kommersielle marknadsavdelinga til «Førjulsjakt», fortel Ljones. Ein «skatt» er gøymd ein eller anna stad i dekningsområdet til avisa, altså i Kvam eller det som tidlegare var Jondal kommune. Finnaren vinn 15.000 kroner.

For å gjera jakta enklare, vert hint om kva ein skal leita etter og kvar dette er gøymt, publiserte i papiravisa, på hf.no og på Bygdavrimmel fram til 20. desember. Eit symbol som liknar ein pengesekk, syner at eit spor er i nærleiken. Ved «skatten» ligg det instruksjonar om kva finnaren må gjera for å få utbetalt premien.

For å unngå at skatten vert funnen for tidleg, vil hinta verta tydelegare og tydelegare jo nærmare 20. desember ein kjem, fortel Ljones.

Deltakarar som bryt lova i jakta på skatten, vert diskvalifiserte.