Biletserie frå trebåtfestivalen: Alle gode ting er tre

Paret kom til Norheimsund frå Atløy i Sogn og Fjordane i den 52 fot lange fiskebåten «Teigasund». Dei fortel at båten vart bygd som fiskebåt på Averøy i 1979. Tidleg på 2000-talet vart båten bygd om til fritidsbåt. Nygjerde og Vilnes kjøpte båten i 2014.Hardanger trebåtfestival hadde dei berre fine ting å seia om.– Dette er eit veldig bra arrangement. Arrangørane har teke godt imot oss, og me har berre møtt trivelege folk. Me har vore nokre turar og sett på bygda. Mellom anna har me vore ein tur på fartøyvernsenteret. Me er også ivrige turgåarar og har vore på eit par fjellturar. Sjølvsagt vert det også mykje båtprat med dei andre båteigarane. Me er positivt overraska over festivalen og kjem nok attende, fortel Vilnes.

Hytte med propell

«Teigasund» har soveplass til åtte personar, og sambuarparet omtaler farkosten som ei hytte med propell.Dei var på båtferie i Hardangerfjorden rundt 1990, men fortel at dette er første gongen dei har vitja trebåtfestivalen.– Me hadde eigentleg tenkt oss på festivalen i fjor. Me var i Bergen, men vêret vart så trasig at det vart skrinlagt, fortel Vilnes.Sambuarparet fortel at det er ein del arbeid med å eiga ein nesten førti år gammal trebåt. – Den krev ein del stell. Eg arbeider offshore og har god tid til å ta meg av båten når eg er heime, men eg har ikkje tid til andre hobbyar, fortel han.

Nådde målet

Festivalen selde 1.500 billettar laurdag, mange truleg på grunn av Ausekarane-konserten, noko festivalsjef Geir Madsen er svært nøgd med. Med det nådde festivalen budsjettmålet. Madsen reknar med at kring tre tusen var innom dei to helgedagane. Sundag var inngangen gratis. Uventa godt vêr var truleg ein viktig del av årsaka til dei gode tala.Til gjengjeld måtte kring femten båtar melda avbod fredag på grunn av sterk vind. Dermed vart det med kring førti utstilte båtar i år. Ein god del nye dukka opp, noko Madsen gler seg over.Han skulle gjerne hatt fleire utstillarar ute, men er nøgd med handverksopplegget og stemninga i festivalteltet. Også dei faglege føredraga på fartøyvernsenteret, ikkje minst eit om Djupevåg båtbyggjeri, trekte bra med folk.– Me fekk mykje skryt for anlegget og arrangementet, seier Madsen, som alt er i gang med diskusjonar om vidareutvikling av festivalen.

Heider for båtstell

Som vanleg vart fleire båteigarar heidra med prisar sundag. Øystein Kaldestad i Norheimsund fekk pris for motoryachten «Gaij», som han kom over i Stavanger for nokre år sidan. Han tilskreiv audmjukt det meste av æra til den førre eigaren.Dei trufaste festivaldeltakarane Ola og Kari Ansnes frå Straumsgrend fekk publikumsprisen for den 44 fot lange skøyta «Balder». Båten frå 1962 er ein tidlegare reketrålar.– Det er ingen luksusbåt, men ei hytte for oss. Me kosar oss gløgg i hel med han, sa Ola Ansnes, trass i at han vart litt stum av heideren.

– Ein stor ressurs

Morten Hesthammer har arbeidd for Hardanger fartøyvernsenter nesten samanhengande sidan 1991. Trebåtbyggjaren vart tildelt æresprisen for innsatsen for å dokumentera og formidla tradisjonane, mellom anna med bokutgjevingar etter intervju med gamle båtbyggjarar.– Det er dei som skulle hatt prisen, men dei fleste er diverre døde, så eg får ta mot for dei, sa den offisersutdanna prisvinnaren frå Langesund.Han har hatt nevane med i ei rekkje store og kjende restaureringsprosjekt, til dømes «Gjøa», «Fram» og «Storeggen». Festivalleiar og arbeidsgjevar Geir Madsen sa at Hesthammer er ein stor ressurs. Faktisk er han såpass ettertrakta at han sjeldan er å sjå i Norheimsund. For tida er han i sving med å restaurera nordlandsjekta «Anna Karoline» i Bodø.– Takk til fartøyvernsenteret for at eg får halda på som eg gjer. Det er ikkje dårleg for ein som har slingra seg gjennom livet å få lov til å gjera nesten som eg vil på jobb, sa Hesthammer.