– Betre, men ikkje bra
Fleire gjekk på kino i 2022 enn i 2021, men det er framleis eit stykke att til besøkstala kinoen hadde før pandemien.
Statistikken syner at 4.538 personar gjekk på kino i Norheimsund i 2022. Det er fleire enn dei 3.167 som gjekk på kino i 2021, men eit stykke frå 2019, då talet var 6.557.
– Koronaviruset ser ut til å ha påverka kinovanane til folk. Det ser me både i Kvam og i resten av Noreg. Sjølv om 2022 er betre enn 2021, vil eg ikkje kalla 2022 eit bra kinoår i Kvam. Ei svært god romjul gjorde at det likevel ikkje vart så verst, fortel kinosjef Mary Ann Sørheim.
Ho fortel at mellom anna dei to norske filmane Kampen om Narvik og Folk og røvere i Kardemomme by var med på å gjera romjula travel.
– Eg visste at dette var fine filmar, men eg er positivt overraska over at så mange ville koma ut i romjula og sjå desse norske filmane på kino, seier Sørheim.
Familiefilmar på topp
Heile sju av dei ti best besøkte filmane i Norheimsund er familiefilmar. Det er òg verdt å merka seg at kvemmingane ser ut til å lika norsk film. Seks av dei ti mest populære filmane er laga i Noreg.
Fleire av dei mest populære filmane har fått litt kommunal draghjelp. Både Clifford: Den store røde hunden og Tre nøtter til Askepott var skulefilmar i 2022. Tre nøtter til Askepott vart sett opp på ordinær visning i 2021 og vart den mest sette filmen det året.
Til saman vart det vist 63 titlar på kinoen i Norheimsund i 2022. Ikkje alle filmane var like populære. Korkje Fest hos Albert Åberg, Thor: Love and Thunder eller Licorice Pizza selde ein einaste billett.
– Eg hadde trudd at det skulle vera større interesse for filmen om Albert Åberg. Eg er òg litt skuffa over at berre seks personar løyste billett til Notre-Dame i flammar, at berre sju ville sjå Alt for Norge og at berre ni såg Elvis. Dette syner at det kan vera veldig vanskeleg å spå kva filmar som slår til, seier Sørheim.
– Kjem for fort
Sørheim trur teknologien har litt av skulda når ein film ikkje presterer. Ein skal ikkje mange år attende før filmane vart distribuerte som gamaldagse filmrullar. Då kom filmen til kinoar i distrikta ein månad eller to etter at den hadde hatt premiere i byane. Slik er det ikkje lenger. No lastar kinoane filmane ned, slik at dei kan ha premiere alle stader samstundes.
– Me har sett fleire gonger at det kan gå litt tid frå ein film har premiere til folk vert merksame på den. Eg opplever rett som det er at folk spør om me ikkje skal syna filmar me allereie har synt, seier Sørheim.
Kinosjefen håpar at utviklinga frå 2022 held fram og at publikum etter kvart finn tilbake til kinovanane frå før pandemien.
