Berre Sp, H og INP ville velja Fosse-tomt

Kvam Sp ville stilla seg bak det nylege vedtaket i fylkesutvalet om å velja tomta med den gamle skulen på Tangerås til etablering av eit Fosse-senter.

Utvalet ville heller ikkje senda saka på høyring, slik fylkesdirektøren føreslo.

Kvam Sp fekk ikkje gjennomslag for framlegget i ein interpellasjon i heradsstyremøtet torsdag 12. desember. Faktisk vart ikkje saka eingong teken opp til politisk handsaming, ettersom berre Sp, H og INP røysta for å gjera det.

– Ikkje forsvarleg

Ordførar Torgeir Næss (Ap) rådde frå å ta saka inn på saklista og opp til debatt. Han viste til at planen hans uansett har vore å greia saka ut og leggja henne fram for heradsstyret i fyrste møtebolk etter nyttår.

Næss sa at han er usikker på framgangsmåten til fylkeskommunen. Etter hans syn er det viktig å syta for ryddige prosessar, all den tid både heradet, fylkeskommunen og staten truleg skal vera med og betala for investering og drift.

– Å slutta seg til vedtaket utan betre avgjerdsgrunnlag er ikkje forsvarleg eller naudsynt. Eg meiner heradsstyret må ha ei utgreiing som gjev betre grunnlag for eit vedtak, sa ordføraren.

Han trur eit eventuelt tomteval vil så tvil om i kva grad prosessen fram mot avgjerda har gått rett føre seg.

– Eg vil ikkje risikera det i ei så viktig sak, seier han.

– Ikkje dumt

Gjermund Stuve (Sp), som la fram interpellasjonen, nytta ikkje høvet til å kommentera synspunkta til ordføraren før røystinga.

I sjølve interpellasjonen formidla Stuve at Fosse-Stiftinga ikkje har slege fast at heile den gamle skuletomta skal nyttast, men at utgangspunktet er den gamle barneskulen. Vidare hevda han at stiftinga ser på Fossvågen og Bruosen som urealistiske lokaliseringsalternativ. Vidare sa Stuve at Trond Mohn skal ha gjeve munnleg lovnad om å gje vekk tomta.

– Det er ikkje dumt med eit engasjement frå eksterne finansieringskjelder, men det kan tørka ut med eit negativt vedtak, sa Stuve.