Bergen skal flagge for Jon Fosse

Byrådet i Bergen kommune har einstemmig vedteke å heise flagget for 10. desember når Jon Fosse får Nobelprisen i litteratur.

– Det blir ei stor markering i samband med dette, og då tenkte vi at det er heilt naturleg å flagge for å markere denne store hendinga, seier byråd for næring kultur og idrett Reidar Digranes (Sp) til Bergens Tidende (BT).

I tillegg til flagginga vil alle skodespela til Fosse bli lesne på Det Vestnorske Teateret frå 8.–10. desember. Det vil ta omtrent 40 timar, og det blir ingen pausar.

Byrådet har òg sendt ei einstemmig innstilling om å nedfelle sitat frå Fosse i bybiletet i Bergen.

(©NPK)