Båtfestivalen er avlyst

Det bestemte årsmøtet torsdag kveld, opplyser festivalsjef Geir Madsen til HF. Avgjerda vart utsett litt til av styret for nokre veker sidan, men smitteutviklinga i det siste og dei nye tiltaka frå regjeringa vart tunga på vektskåla.

— Uvissa har auka. Det er vanskeleg å samla sponsorstønad og henta inn løyve når alt er så usikkert, seier Madsen.

Saman med otten for at festivalen skal enda som «episenter» for eit smitteutbrot førte desse faktorane til avgjerda.

Madsen seier ein minifestival i ei eller anna form er vurdert, men forkasta. Det same er utsetjing til hausten. Frykta er at festivalen kan risikera å mista oppslutning.

— Me held koken og er innstilte på å prøva igjen til neste år.

— Korleis kjennest ei ny avlysing for deg som festivalsjef?

— Det er litt opp og ned. Med to års pause vert det spanande å sjå om me klarar å dra det i gang att. Men alle ser heilt sikkert fram til å møtast att, så kanskje ligg det an til ein skikkeleg fest. Det motiverer oss til å halda fram, seier Madsen.

Festivalen med eit budsjett på om lag 100.000 kroner har fått behalda den kommunale stønaden på 15.000 kroner frå i fjor. Ettersom det meste festivalarbeidet vert utført på dugnad, er den økonomiske situasjonen trygg, men Madsen er spent på korleis det vert å få tak i sponsorar i 2022.

Artistane som var tinga til i fjor, hadde ynskt å stilla opp i år. Madsen reknar med at ein må starta på null att og skaffa nye innslag til neste år.