Badekino i badeland

Dette er fyrste gong eit kinolerret vert rigga opp i badeanlegget. Filmen har den passande tittelen «Bukkene Bruse på badeland» og skal visast i to puljar. Ideen er inspirert av Bømlo symjehall, som hadde teaterframsyning av stykket i haust.

– Opplegget deira var litt for storslege for oss. Det er éin ting å koma med idear, men dei må jo kunna gjennomførast òg, seier Anita Storemark.

Ho er i sluttfasen som dagleg leiar hjå Hardangerbadet. Ifølgje henne var det viktig å ha nokon som kunne styra med det tekniske dersom anlegget skulle arrangera kino. Der kom Martin Neteland, med mange års erfaring som kinoteknikar, inn på banen. Han arbeider som byggdriftar i Hardangerbadet.

– Med Martin på laget lèt det seg gjera, fortel Storemark.

Vidare tok Storemark kontakt med Kvam kino. Kinosjef Mary Ann Sørheim i Kvam herad var svært positiv til prosjektet. Dermed starta eit samarbeid. Storemark tykkjer det er kjekt å arbeida saman med kommunen.

– Alle kan ikkje sitja på kvar si tue. Me er avhengige av å støtta oss på kvarandre og jobba saman, seier ho.

Passar til aktive born

Både Tromsøbadet og AdO Arena har arrangert badekino før. Dei har store lokale og mange gjester.

– Det har vore veldig populært. Vesle Hardangerbadet må klara å glimta til med noko liknande, seier Storemark.

Ifølgje henne er det alltid ein risiko å arrangera ting for fyrste gong. Ho tykkjer uansett det er kjekt. Storemark fortel at ingen av dei tilsette hadde drive badeland før dei starta opp for fire år sidan.

– Det er Hardangerbadet i eit nøtteskal. Mottoet kunne vore «det har me aldri gjort før, så det vert sikkert bra», seier ho.

Badekinoen skal skje på borna sine premissar. Her treng dei ikkje sitja roleg eller kle seg opp i finstasen. Tvert imot – dei kan stå og hoppa om dei vil. Ifølgje Stormark er dette ei fin moglegheit til å koma seg ut av huset.

– Å gå på vanleg kino med små born kan vera heilt håplaust. Dei fer rundt som tornadoar. Her går det heilt fint, seier Storemark.

Påtroppande dagleg leiar for Hardangerbadet, Natalie Nisamjan, har snakka med fleire barnefamiliar som gler seg til kinoen. Sjølv får ho familiebesøk frå Austlandet og skal vera med og sjå filmen som gjest. Ho trur arrangementet vil falla i smak hjå borna.

– Born likar å dansa, hoppa, spretta og leva ut filmen i kroppen. Det får dei absolutt gjort på badekino, seier Nisamjan.

Liten økonomisk gevinst

Allereie torsdag føremiddag var over halvparten av billettane selde. Kvam kino styrer salet gjennom nettsida deira. Etter å ha testa kinooppsettet i badehallen, vart grensa sett på hundre publikummarar per visning. Storemark fortel at både Kvam kino og Hardangerbadet kjem til å tena mindre enn dei hadde ynskt.

– Me vert ikkje rike av dette, men det viktigaste er å skapa noko nytt og kjekt for barnefamiliar i jula, seier ho.

Ifølgje Nisamjan vert talet badevakter dobla under kinoen for å sikra tryggleik. Det vert også sal av til dømes popkorn i kiosken.

Nisamjan fortel at Kvam kino sender ut eit infoskriv til alle som kjøper billettar. Der står opningstidene og kva som er lurt å tenkja på.

– Det kan fort verta litt kaos i resepsjonen når så mange skal inn og ut samtidig, men det går nok fint, seier Storemark.

Nisamjan fortel at det kan verta aktuelt med badekino fleire gonger. Arrangementa kan også rettast meir mot vaksne.

– Det finst «drive-in-kino», så kvifor ikkje ha «swim-in-kino”? spør ho.