Avsluttar med prøve og utstilling
Korgmakar Hege Iren Aasdal, som bur i Steinstø, går spanande dagar i møte.
Ho er i ferd med å avslutta eit treårig stipendiat for Norsk håndverksinstitutt, og avlegg den avsluttande prøven torsdag 11. januar, skriv instituttet på Internett. Det skjer på det kulturhistoriske museumssenteret Maihaugen på Lillehammer.
Aasdal fortel at ho er spent på det som skal skje.
– Sensorane skal vurdera og godkjenna arbeidet eg har gjort dei siste åra, fortel ho.
Det er sett av tre timar til prøven.
I samband med prøven inviterer instituttet til fagdag og handverksdemonstrasjonar på same stad. Fagdagen er 12. januar, medan handverksdemonstrasjonane er 13. og 14. januar.
Aasdal har laga utstillinga «Korgtradisjonar i Noreg» på Maihaugen. Utstillinga opna 15. desember og skal stå til 3. mars. Ifølgje nettsidene til Norsk håndverksinstitutt har Aasdal dei siste fem åra jobba med tradisjonelle korger laga av splitta materiale. Ho har skaffa seg oversikt over kva korger som vart laga rundt om i landet og kva materiale dei vart laga av, og ho har lært seg teknikkane som vart nytta. Utstillinga viser eit utval korgtypar.
