Avslutta med stil
Eksklusive materialar var henta fram då trebåtbyggjar Karsten Johan Lund (80) bygde det han hevdar er hans siste båt.
Båten, som er ein strandebarmar, vart levert til kjøpar Henning Grønhaug fredag 10. mai. Det vart feira i båtbyggjarverkstaden på Omastrand med vaflar, kaffi og brus. Så snart båten var sjøsett, vart den rodd over fjorden til Torsnes, der Grønhaug bur.
– Eksklusiv utgåve
Båten er laga av furu, men keipane, esinga, kjølen og stamnen er laga av eik. Båten har koparsaum.
– Dette gjer båten til ei eksklusiv utgåve av ein strandebarmar. Den er så fin at eg nesten vert rørt, fortel Grønhaug.
Han fortel at han alltid har hatt lyst på ein slik båt.
– Det vert vanskelegare og vanskelegare å få tak i desse båtane. Då eg fekk høyra at dette skulle vera den siste båten til Lund, bestemde eg meg for å kjøpa den. Den vert eit klenodium eg skal bruka på sjøen og på ferskvatn. Eg skal ta godt vare på båten og halda den like fin som den er no, fortel han.
– Mykje arbeid
Arbeidet med båten byrja i fjor haust. Båtbyggjaren vil ikkje ut med kor mange timar han har brukt.
– Det er mykje arbeid å laga ein strandebarmar. Materiala er vanskelege å få tak i. Du får ikkje det du treng på ein vanleg trelasthandel. Alt er spesiallaga på lokale sagbruk, fortel Lund.
Lund hevdar hardnakka at han ikkje kjem til å byggja fleire båtar. Verkstaden like ved Fjellstrand AS kjem likevel ikkje til å liggja heilt utbrukt.
– Eg kjem nok framleis til å putla med litt småting, seier han.
– Lærte tidleg
Lund har bygd båtar heile livet. Som yrkesaktiv laga han båtar av plast og aluminium hos verftet Fjellstrand. Trebåtar byrja han for alvor å byggja etter at han pensjonerte seg i 2006.
– Eg tykkjer det er kjekkare og meir utfordrande å byggja i tre enn i aluminium. Aluminiumen er heilt glatt, medan tre har kvistar, fortel Lund.
Kunsten å byggja båtar lærte han tidleg. Far hans var profesjonell trebåtbyggjar. Lund hjelpte til og lærte handverket på den måten. Verkstaden vart bygd av far hans i 1955.
Strandebarmaren har fått namnet «Kira II». Den er kalla opp etter barnebarnet til Grønhaug, Kira Grace Prince, som er gudmor til robåten.
