Avslører giftige teoriar
Øyvind Strømmen held føredraget Konspirasjonsteoriar og deira øydande kraft i Kabuso måndag 7. mars.
Det opplyser arrangør Kvam Senioruniversitet i ei pressemelding. Føredraget vil ta føre seg konspirasjonsteoriar som fenomen og problem, og korleis dei kan vera eit symptom på faktiske samfunnsutfordringar.
Strømmen er informasjonsrådgjevar i Kvam herad og forfattar. Han er utdanna religionsvitar og journalist. Han har skrive fleire bøker om høgreekstremisme og høgreradikalisme, mellom dei Det mørke nettet (2011) og Den sorte tråden (2014), opplyser senioruniversitetet.
I tillegg har han skrive ein biografi om Anders Lange og ei bok om Ungarn. Hausten 2021 gav han ut boka Giftpillen: om konspirasjonsteorienes ødeleggende kraft på Res Publica forlag. Boka omhandlar konspirasjonsteoriar som fenomen og utfordring. Strømmen er fylkestingspolitikar for Miljøpartiet Dei Grøne.
