Avlyser, avlyser og avlyser kanskje

Koronaviruset fører til ein sterkt redusert festivalsommar i Kvam.

Forbodet mot kultur- og idrettsarrangement vart tysdag lengt til 15. juni. Dette gjer at styra til Hardanger Trebåtfestival, som skulle gå av stabelen frå 12. til 14. juni, og Hardingtonar, som skulle vera frå 4. til 7. juni, har avlyst festivalane. Det var uaktuelt å utsetja dei to festivalane.

– Det er så usikkert kva som skjer etter 15. juni at det er vanskeleg å motivera folk til å stilla opp seinare i sommar, seier trebåtfestivalsjef Geir Madsen.

– Me er avhengige av å få Bergen Filharmoniske Orkester til Norheimsund. Det vert for mykje som skal klaffa til at me klarar å få til ein festival seinare i år, seier styreleiar i Stiftinga Hardingtonar, Geir Botnen.

– Kjem sterkt attende

Festivalane har allereie hyra inn artistar. Likevel trur korkje Madsen eller Botnen avlysingane vil føra til store økonomiske tap.

– Så lenge me må avlysa på grunn av utanforliggjande tilhøve som me ikkje er herre over, slepp me å betala honorar. Eg håpar og trur at dette ikkje skal få store økonomiske konsekvensar for oss, seier Botnen.

Begge festivalsjefane trur på betre tider til neste år. Då vert Hardingtonar og Hardanger Trebåtfestival arrangerte samstundes.

– Eg trur svolten etter eit nytt Hardingtonar byggjer seg opp både blant oss som arrangerer og blant publikum. Me kjem til å satsa på eit flott arrangement til neste år, då Hardingtonar fyller 30 år, seier Botnen.

– Ikkje berre kjem trebåtfestivalen og Hardingtonar samstundes neste år. Vestland fylkeskystlag har bestemt at laget skal leggja fylkestreffet inn i trebåtfestivalen til neste år. Det gler me oss til, seier Madsen.

– Me er usikre

Innan 1. mai skal regjeringa avgjera om arrangementsforbodet skal vara resten av sommaren. Dersom forbodet ikkje vert lengt, kan musikkfestivalen Bygdalarm, som er planlagd 3. og 4. juli, gå av stabelen i Norheimsund. Festivalsjef Ida Sørheim seier at festivalstyret sit på gjerdet.

– Me er veldig usikre på kva me skal gjera og skal drøfta situasjonen på eit styremøte 15. april. Det kan godt henda me kjem til å venta med å bestemma om me skal avlysa til etter 1. mai, seier ho.

Ho fortel at arrangørane er klare til å gjennomføra festivalen dersom dei får lov.

– Festivalen vert neppe heilt som den plar vera. Det vert truleg ein del restriksjonar på kor tett folk får stå. Vert det ingen festival i sommar, kan det henda at Bygdalarm arrangerer eit anna arrangement seinare i år. Uansett satsar me på å vera attende til neste år, seier ho.