Auka medlemstalet med 21 prosent

Noregs Mållag gjennomførte i haust ein kampanje for å auka talet på nye medlemer. Kvam Mållag var mellom dei flinkaste i klassen og kom på 5.-plass i vervekampanjen, etter å ha verva 18 nye medlemer i haust.

Mållaget opplyser i ei pressemelding at auken førte medlemstalet opp til 104. Sidan har laget fått ein medlem til.

Ifølgje eit oversyn frå mållaget var mållaga i Oslo og Bergen dei som voks mest i fjor, med høvesvis 76 og 67 medlemer. Samla hadde Noregs Mållag 14.104 medlemer etter 2020, som er det høgaste talet på 32 år. Ein auke på 1.000 medlemer vart registrert i fjor.

Premien for verveinnsatsen er ein bokpakke. Denne vil Kvam Mållag donera til barnehagar, opplyser leiar Randi Jåstad.

— Målrørsla trengst

Ho vonar på endå fleire medlemer, og meiner målrørsla trengst på mange felt i samfunnet. Til dømes viser ho til at ein del lærebøker framleis berre vert gjevne ut på bokmål. Digitale læremiddel, som har vorte vanlege i bruk i koronatida, er ikkje alltid tilpassa nynorskelevar. Her må elevar, foreldre og skuleverket vera på vakt, meiner mållaget, som i tillegg konstaterer at engelsken snik seg inn i språket.

Jåstad opplyser at mållaget har vore i kontakt med vegstyresmaktene og drøfta vegskilt med bokmålstekst i nynorskområde. Ansvarstilhøva er uklare, og ifølgje mållaget har fylkeskommunen teke sjølvkritikk og lova å vera merksam på problemstillinga.

Avlyste alt

Mållaget, som mange andre, måtte avlysa alle planlagde arrangement i fjor. Ingen nye er planlagde før sommaren, anna enn årsmøtet i februar. Vona er at det vert mogeleg å skipa til Littlarm i samarbeid med Bygdalarm i juli. Dessutan håpar ein å få delt ut målprisen til ei verksemd i oktober. Elles planlegg laget kulturkveldar fleire stader i heradet i haust.

— Me må berre vera tolmodige og gle oss til at kulturlivet kan opnast opp att etter pandemien, skriv mållaget i pressemeldinga.