Andre fase av rehabiliteringa startar sommaren 2023
Bergen og Hordaland Turlag har søkt kraftfondet i Kvam herad om 500.000 kroner til ytterlegare rehabilitering på Breidablik.
Turlaget skal, i samarbeid med Kvam Turlag, oppgradera den fyrste hytta Bjarne Huse reiste i tunet, 1.160 meter over havet. Laga ynskjer å ta vare på mest mogeleg av det originale bygget, og vil berre skifta ut det som er i dårleg forfatning.
Størstedelen av anlegget er ferdig rehabilitert. I denne andre fasen ynskjer laget å ta vare på det etablerte tunet gjennom å restaurera uteområda og gjera naudsynt vedlikehald og rehabilitering. Det er sårt tiltrengt, meiner laga.
Bergen og Hordaland Turlag (BHT) eig hyttetunet, men drift og utvikling av anlegget skjer i samarbeid med Kvam Turlag og lokale eldsjeler.
– Det er viktig for BHT at me speler på lag med lokale krefter og tek vare på det særmerkte landemerket som Bjarne Huse bygde opp på Breidablik, heiter det i søknaden.
Prosjektleiar Johnny Bjørge er byggmeister og har lang erfaring med bygging og rehabilitering av hytter i fjellet. Det meste av arbeidet vert utført av innleigde entreprenørar, men noko av arbeidet vert også utført på dugnad av Kvam turlag.
Fasaden er i stein, men reisverk og golv i tre er i dårleg forfatning og må skiftast. Det er utfordringar med vatn i grunnen under hytta, og det må støypast og isolerast. Det er også aktuelt å skifta ut vindauge, dører og noko av interiøret.
I uteområda har stor trafikk, vêr og frost gjort sitt til at det trengst vedlikehald. Dette er manuelt arbeid som krev både tid og spesialkunnskap, opplyser BHT.
Arbeid og materiell på gamlehytta vil kosta 725.000 kroner, stipulerer BHT. Nytt inngangsparti på hovudhytta vil kosta 300.000 kroner, og det same vil arbeidet i uteområda. Laget reknar med 180.000 kroner i helikoptertransport og 50.000 kroner til solcelleanlegg.
BHT har fått stadfesta at laget får 468.000 kroner i spelepengar i år, og vonar på 500.000 kroner frå Sparebankstiftinga Hardanger i 2023. Samla kostnad i 2022 og 2023 er vel 1,6 millionar kroner.
Arbeidet er planlagt gjennomført i sommarsesongen 2023. Det avheng av når snøen forsvinn, men alt må vera avslutta før hausten og vinteren, skriv BHT.
