Anders Magnus kjem til Kvam
Journalist, forfattar og programleiar Anders Magnus held føredrag i Kabuso måndag 23. januar.
Det går fram av ei pressemelding frå Kvam Senioruniversitet.
Magnus skal snakka om USA, Kina og framtida for demokratiet. Han har vore utanrikskorrespondent for NRK i Afrika, Asia og USA. Nyhendekommentatoren har òg bakgrunn frå TV 2 og Bergens Tidende.
Magnus har vore vitne til opptøyar, militærkupp, krigar og katastrofar i fire tiår som nyhendeformidlar. Han har besøkt 45 av dei 50 delstatane i USA, ifylgje pressemeldinga.
I åra som utanrikskorrespondent har Magnus hatt samtalar med mellom andre president Nelson Mandela og biskop Desmond Tutu i Sør-Afrika, PLO-leiar Yasir Arafat, statsminister Yitzhak Rabin i Israel og Shimon Peres i konflikten i Midtausten, Dalai Lama og Aung San Suu Kyi i Asia og presidentane Jimmy Carter og Bill Clinton frå USA.
