Amatørbåtbyggjarar laga liv på trebåtfestivalen
På Hardanger trebåtfestival såg eit heilt nytt innslag dagens lys. I båtbyggjartevlinga Fort og gale fekk eit knippe amatørar prøva seg som båtbyggjarar for første gang.
Tre lag med tre eller fire medlemer kvar skulle byggja kvar sin farkost i festivalhelga. Tevlinga kulminerte sundag med at farkostane padla om kapp i hamna i Norheimsund.
Katamaran og kano
Deltakarane på dei tre laga fekk nøyaktig dei same materialane å arbeida med. Likevel valde dei tre heilt ulike framgangsmåtar. Torgeir Magnar Børve, Torleiv Ljones, Sigmund Vereide og Liv Lyngstad laga ein katamaran i den tru at to skrog skulle gjera farkosten ekstra stabil. Båten fekk namnet Eplebåten.
Hans Pulles, Per Kristian Kjepso og Peter Dalmazzo lét seg inspirera av kanoar då dei konstruerte farkosten Float Boyzz. Karane bak farkosten Vannskrekk – Erik Tombre, Victor Tombre og Keith Barker – laga ein trekopi av ein dampbåt med innebygde skovlhjul.
Då HF snakka med dei tre laga laurdag ettermiddag, var alle like overtydde over at deira konstruksjon var den mest sjødyktige. I regattaen sundag viste det seg at den kanoinspirerte Float Boyzz var klart mest effektiv. Båten skaut fart frå starten av og parkerte konkurrentane. Så suveren var kanoen at mannskapet like godt tok ein liten pause midtvegs i tevlinga og kasta ut fiskesnøret. Fiskepausen hindra ikkje laget i å koma først i mål med god margin.
Konkurrentfestival i Bergen
I år vart Hansadagane i Bergen arrangert samstundes med Hardanger trebåtfestival. Trebåtfestivalsjef Geir Madsen frykta konkurransen frå festivalen i Bergen skulle føra til tom hamn i Norheimsund. Det hadde han ingen grunn til. Rett nok hadde fleire av dei største og mest kjende trebåtane valt å setja kursen mot Bergen, men likevel hadde om lag førti trebåtar funne vegen til Norheimsund i helga. Sjølv om det er eit stykke unna rekorden på seksti, er Madsen nøgd.
– At fleire av dei store båtane som er faste gjester, ikkje var her i år, gjorde at det såg litt tommare ut langs bryggjene enn vanleg. Men når dei store båtane manglar, vert også dei mange mindre båtane meir synlege. Eg har snakka med fleire båteigarar som seier det ikkje kunne ha falle dei inn å dra til Hansadagane og liggja der i skuggen av store båtar, seier han.
– Set Norheimsund på kartet
Sjølv om publikumstala ikkje var klare då HF gjekk i trykken, meiner Madsen at festivalen var godt besøkt.
– Me slår nok ikkje rekorden på om lag sj tusen, men magekjensla seier at festivalen var godt besøkt. Og dei som var her, såg ut til å smila og kosa seg i sola. Dei gjestene eg har snakka med, har vore svært positive. Eitt av måla med festivalen er å setja Norheimsund på kartet blant båtfolket. Det synest eg me klarte på ein fin måte i år òg, seier han.
Talet på utstillarar var i år 35. Det er litt under rekorden på 45.
