– Alt er enklare når me dreg lasset i lag

Dei to organisasjonane har hatt andre samarbeid, men prosjektet Tematreff i Torefjell er eit spesielt tiltak som har vakse seg stort og viktig, ifylgje Soldal.

Møtestader på nett

Då korona «stengde» Noreg i mars 2020, forstod Grannehjelpa at ein trong sosiale møteplassar på nett. Grannehjelpa og biblioteket søkte om og fekk pengar til prosjektet Saman på nett i lag med Klepp Frivilligsentral og Klepp bibliotek. Alt skulle skje på nett.

Det digitale verktøyet Whereby vart kjøpt inn, og allereie før påske i 2020 var ein i gang med opplæring.

Det var ein suksess, men seniorane var ikkje til stades. Difor bestemte ein seg for å gjera ein ekstra innsats for å få dei med. Dei ti digitale møteromma ein hadde kjøpt, måtte ut til folket.

For at det ikkje skulle verka så framandt å møtast digitalt, fann ein på å kalla møteromma opp etter lokale fjelltoppar – Skrott, Solhaug, Vesoldo og Torefjell.

La vekt på innhald

Ein fann fort ut at det trongst målretta opplæring og eit interessant innhald. Mange eldre tenkte nok at «dette er ikkje noko for meg, dette kan eg ikkje meistra». Og det var ikkje enkelt, med alle dei ulike formene for datamaskiner som finst. Men ein hadde ein filosofi om å ikkje gje seg før ein fekk det til, fortalde Soldal.

Grannehjelpa og biblioteket oppsøkte pensjonistane og hadde ein-til-ein-kurs. Dei spreidde lenkja til rommet på Facebook, nettsider, i tekstmeldingar, e-postar og i lokalavisa. Romma stod alltid opne, så alle kunne øva seg på å logga på kva tid som helst.

Då det nærma seg jul, fekk Grannehjelpa «den geniale ideen» å laga gåvekort på digital opplæring.

Misforstod i starten

Tematreffa var ein suksess, sjølv om ein knota litt i byrjinga. Med datamaskiner er det ofte eit godt råd å avslutta og byrja på nytt om noko er feil, ifylgje Soldal.

Ein gong føreslo rettleiaren å gå ut av rommet og koma inn att. Då reiste nokre seg og gjekk ut av stova. Det var ikkje det fysiske rommet som var meint – men ein fann ut av det òg. Andre trudde at det var på fjellet Torefjell ein skulle ha tematreff – men dei fekk oppklara det òg.

Kvart tematreff byrjar presis, men mange loggar seg inn tidleg for å vera klare og slå av ein prat med andre.

– Nett som når me samlast fysisk til noko! sa Soldal.

Det er no plass til hundre deltakarar i kvart digitale rom.

Forvitnelege emne

Mellom dei ulike tema som har vore tekne opp, er vaksinar, bunader, litteratur og demens. Dessutan er kvemmingar som har flytta ut, til dømes skodespelar Frank Kjosås, intervjua.

I kjølvatnet av tematreffa har det danna seg ein programkomité, ei gruppe frivillige som har teke eigarskap til tematreffa. Ho samlast jamleg og legg planar. Tanken er å nytta lokale ressursar i Kvam eller utflyttarar frå Kvam. Og folk seier ja og stiller, utan å forventa løn.

Biblioteka og dei frivillige er viktige for kvarandre, har leiaren for Norsk bibliotekforening uttala.

– Det må eg berre seia amen til, sa Soldal.

Ho avslutta med eit Arne Garborg-sitat:

– Tek kvar og ein sin vesle stein, vert snart vår åker rein.

– Og det er sant. Alt er enklare når me dreg lasset i lag. Jippi for samarbeid, sa Soldal.

Temaet for konferansen 16. november var Frivilligheit byggjer samfunn. Soldal snakka om på kva måte frivillige organisasjonar og det offentlege kan samhandla for å utvikla gode lokalsamfunn. Konferansen vart skipa til av Vestland fylkeskommune på Scandic Hotel Norge.