«Alfa» er komen på sjøen

4. september 2020 døydde Storaas, ein samfunnsengasjert og natur- og kulturinteressert mann, brått og uventa då han var på smalejag. Sjøtunet på Rykkje måtte såleis drivast vidare utan hans hjelp.

Tårer trilla då mor til Storaas, Gyda, nesten på dagen fire år etter dødsfallet fekk æra av å vera gudmor og døypa den nye åttringen til fartøyvernsenteret. I ein kort tale takka ho hjarteleg for at den tidlegare arbeidsgjevaren til sonen vil æra han med oppkalling.

Etterpå vart ho og krykkjene lyfta opp i ronga for å vera med på elddåpen til robåten, som har fått namnet «Alfa». Gudmora vart rodd att og fram på sundet av eit knippe sterke, sjøvane mannfolk.

Erstatning etter kollaps

Fartøyvernsenteret skal ha båten sjølv og nytta han til utleige i turistsesongen og til kyrkjebåt, opplyste formidlingsleiar Sjur Tarjei Fykse. Han erstattar ein annan båt frå år 2000 – sjølvaste tusenårsbåten i Kvam – som vart øydelagd då eit tak på ein hall kollapsa i vinter.

– Me bestemte oss fort for at me måtte byggja ein ny av same type, fortalde Fykse.

Originalen, ein klassisk hardangerbåt med hogde halsar, er ein hurtigbåt frå Nå i Sørfjorden og ligg på reiparbanen til fartøyvernsenteret. Han vart bygd kring 1880, men vart seinare liggjande unytta i eit naust etter at vegane overtok for sjøen som hovudveg.

Peter Helland-Hansen, leiar for småtbåtverkstaden, har leia bygginga. Med seg har han hatt småbåtbyggjarlærling Jonathan H. Høj frå Danmark, som til glede for dei spesielt interesserte fortalde om dei tekniske finessane og detaljane.

Fekk stønad

Bygginga av farkosten er grundig dokumentert av Silje Ensby. Videoane er, som mange andre av dei senteret publiserer, sette av svært mange. Nærare bestemt er dei viste kring 12 millionar gonger.

Ifylgje henne prøvde senteret denne gongen å omsetja ein del av dei erigerte tomlane til kroner og øre gjennom ei innsamling. Det resulterte i gåver på i alt 217.000 kroner. Dei fleste ytingane var små og kom frå lokale heltar, medan éin gjevar donerte 200.000 kroner til båten. Målet var å samla inn 290.000 kroner.

Konklusjonen hennar, sidan dei aller fleste velgjerarane er lokale heltar, er at det framleis er nokså vasstette skott mellom den digitale livet og dagleglivet på fartøyvernsenteret.

– Det er kjekt med engasjement og heiing, men det er støtta som har gjort prosjektet mogeleg, fortalde ho.

Sjå video frå sjøsetjinga her: