300.000 til feiring av Fosse
Fylkesutvalet har løyvt 300.000 kroner til markering av at Jon Fosse får Nobels litteraturpris for 2023.
Det melder vestlandfylke.no.
Det Vestnorske Teateret vert ein sentral aktør i arrangementet i Bergen i desember, med Vestland fylkeskommune som ein av fleire samarbeidspartar. Arrangørane ynskjer å halda detaljane i programmet hemmeleg ei stund, men lovar eit flott arrangement som er ein nobelprisvinnar verdig.
Fosse får overrekt prisen i konserthuset i Stockholm på Nobel-dagen 10. desember. Same helg er det lagt opp til ei markering i Bergen, og det er denne fylkeskommunen vil bidra til.
Fylkesordførar Jon Askeland meiner prisen er ei stor hending for alle vestlendingar. Det er fyrste gong ein forfattar frå Vestland får prisen, og det er fyrste gongen ein forfattar som skriv på nynorsk, får han.
– Dette er ei markering av ei nasjonal og internasjonal hending og ei stor anerkjenning av nynorsk som skriftspråk. Me meiner difor det er naturleg at staten vil bidra til markeringar, seier Askeland.
Fylkesutvalet oppmodar andre arrangørar om å arbeida for ytterlegare finansiering. Utvalet er i tillegg positiv til ei lokal markering i Kvam herad og ynskjer velkomen ein søknad frå Fosse-Stiftinga om eit slikt arrangement.
