Utset innkrevjing av parkeringsgebyr!
Til styret i Odda Parkering AS.
Kopi til ordførar og rådmann i Ullensvang kommune:
Artikkelen held fram under annonsen.
På vegner av kommunestyregruppa til Raudt Ullensvang vil eg med dette oppmode styret i Odda Parkering AS om å leggje på is all aktivitet i form av innkrevjing av parkeringsbøter og -avgifter i Ullensvang kommune.
For det første er også innbyggjarane i Ullensvang kommune i ein unntakstilstand, der fokus for kommunen og kommunale selskap må vere å gjere det lettare – ikkje vanskelegare – å leve med verknadene av koronakrisa, både menneskeleg og økonomisk. No nærmar vi oss påskeferie. Fleire bøter og parkeringsavgifter for dei som vil ta seg ein tur til Odda sentrum eller i fjellet, aukar stressfaktoren i kvardagen i desse tider.
For det andre har Raudt Ullensvang sine representantar, Andreas Jacobsen og Jane Ripley, saman med kommunestyrerepresentantane Hildegunn Espe (Sp) og Finn Hagen (Frp), tatt initiativ til ein lovlegkontroll av fleirtalsvedtaket i Ullensvang kommunestyre 26. februar. Fleirtalet på 19 mot 14 røyster vedtok då å avvise innbyggjarinitiativet frå nesten 2500 innbyggjarar om å vurdere på nytt innføring av parkeringsavgifter i kommunen. Inntil dette initiativet er blitt handsama på nytt i Ullensvang kommunestyre i det neste møtet 29. april – eventuelt etter vurdering av Fylkesmannen, bør vidare innkrevjing av parkeringsgebyr i nye Ullensvang kommune bli lagt på is.
Odda, 31. mars 2020
