Unge studentar si framtid i Kvam – ei investering vi ikkje kan oversjå

Eusebiu Amanalachioai, heradsstyrerepresentant for Ap og student

Som den yngste kommunestyrerepresentanten i Kvam herad, og som student i økonomi og administrasjon i Sogndal, har eg eit brennande engasjement for å sikre at unge i vår kommune ser ei framtid her. Det er eit stort ansvar og ei utfordring vi må ta på alvor. Korleis kan vi gjere Kvam til ein stad der unge vil både veksa opp og fortsetta liva sine? Kvam er ein stad som byr på mykje. Med spektakulær natur, eit rikt kulturliv og eit steinkast unna andre tettstader har vi eit utgangspunkt mange skulle ynskje dei hadde. Likevel ser vi at mange unge flyttar ut av kommunen. Dei vert lokka av moglegheitene som finst i større byar. Dette er ei utvikling vi arbeider med å snu. Det har vore stor semje i Kvam om å satsa på tiltak gjer oppvekstmiljøet betre. Vi må vise ungdommen at framtida deira kan vere i Kvam – ei framtid der dei kan kjenne seg heime, finne spennande jobbar og skape eit godt liv. Eit viktig faktor er å styrke bandet mellom Kvam og høgare utdanningsinstitusjonar. Tenk om Kvam kunne bli ein plass der studentar kjem for å ta praksis eller starte opp nye bedrifter? Om lokale bedrifter til dømes legg til rette for trainee-stillingar, kan nyutdanna få sjansen til verdifulle erfaringar i dei lokale bedriftene. Slik kan vi byggje kompetansen vi treng, samstundes som vi held på dei unge. Bustad er ein avgjerande faktor for å flytte heim igjen. Unge treng rimelege og attraktive bustader dersom dei skal ha moglegheit til å etablere seg. Kommunen må ta eit aktivt ansvar for å sikre at det finst alternativ som passar for studentar og unge familiar. Samstundes må vi satse på entreprenørskap og leggje til rette for at unge som drøymer om å starte eiga bedrift, blir møtte med mellom anna små etableringsstipend og mentorordningar. Slike tiltak kan gje nyttig hjelp, erfaring og motivasjon. Livet handlar om meir enn jobb og bustad. Eit levande sentrum, gode kollektivtilbod og arenaer for kultur og idrett er viktige faktorar for at unge skal trivast. For Kvam er ungdomen viktig, og endå viktigare er det at ungdomen kjenner tilhøyrsel, fellesskap og meistring gjennom tilboda i kommunen. Eg ynskjer at vi alle i Kvam – politikarar, næringsliv, foreldre og ungdom – står saman om å byggje ei framtid der alle unge føler seg sette og verdsette. Investerer vi i ungdommen, investerer vi i Kvam si framtid. Med eit godt samarbeid på tvers av ulike roller i samfunnet er eg motivert for at vi saman kan arbeida mot eit felles mål om å arbeida for unge sin motivasjon til å dyrka si framtid i Kvam.