Ullensvang kommunestyre seier nei til atomvåpen!

Lisa Karine Haugland, Raudt Ullensvang

Lofthus, 27.01.25

Interpellasjon til kommunestyremøtet 05.02.25:

I 2017 vedtok FNs generalforsamling ein avtale som forbyr statar å utvikle, prøvesprengje, produsere og skaffe atomvåpen. Avtalen tredde i kraft i 2021, og i dag har 167 land signert eller ratifisert denne viktige, globale forbodsavtalen. Noreg har så langt valt å gå imot FN-fleirtalet.

FN sin generalsekretær åtvara i 2024 om at risikoen for ein atomkrig er større enn på fleire tiår. Bakteppet for uttalen er pågåande storkrigar i Ukraina og Midtausten, rekordmange konfliktar i verda og stor global uvisse. Spenninga mellom atomvåpenstatar aukar, og det internasjonale nedrustingsarbeidet har stoppa opp. Ifølgje FN er det 9 land som har atomvåpen: Russland, USA, Kina, Frankrike, Storbritannia, Pakistan, Israel og Nord-Korea.

Så lenge atomvåpen finst, er det ein risiko for at katastrofen skjer. All bruk av atomvåpen utgjer ein enorm trugsel for menneske, samfunn, klima og miljø. I 2025 er det 80 år sidan USA sleppte atomvåpen over Hiroshima og Nagasaki. I desember 2024 vart Nobels fredspris tildelt den japanske organisasjonen Nihon Hidankyo, ein organisasjon stifta av overlevande atombombeoffer som arbeider mot utbreiing av og for avskaffing av atomvåpen.

Den internasjonale kampanjen for å avskaffe atomvåpen (ICAN) er ein koalisjon av organisasjonar over heile verda som fremjar FNs atomvåpenforbod. ICAN fekk Nobels fredspris i 2017 for sitt arbeid, og står bak ICAN Cities Appeal, eit globalt opprop kor byer og kommunar kan vise si støtte til FNs forbod mot atomvåpen og bidra til å auke presset på nasjonale mynde. Hittil er 82 norske kommunar med i avtalen, m.a. Ulvik, Voss og Bergen.

Forslag til vedtak:

1. Ullensvang kommunestyre ber ordføraren om å signere ICAN Cities Appeal til støtte for FN sitt vedtak om å forby atomvåpen.

2. Ullensvang kommunestyre er djupt bekymra for atomvåpentrugsmålet. All bruk av atomvåpen vil ha katastrofale, omfattande og langvarige konsekvensar for menneske, samfunn, klima og miljø. Difor støttar Ullensvang kommunestyre FN sitt atomvåpenforbod og oppmodar den norske regjeringa til å bli ein del av avtalen.