Tunnel-påhogg i Steinsdalen

Det dreg seg til mot ei avgjerd omkring tunnelpåhogg for Kvamskog-tunnelen, både i Eikedalen og Steinsdalen. Det tilrådde alternativet for Steinsdalen vil ha med seg to svært inngripande konsekvensar:

• Rasering av fleire tun, og fjerning av mange hus, både driftsbygningar og bustader.

• Ei særdeles dominerande og skjemmande gangbru, 170 meter lang, 6 meter høg.

Alternativet med rundkøyring, som fylkeskommunen ikkje ynskjer å diskutera, reduserer alle desse ulempene:

Ein unngår mastodont-gangbrua (som ingen kjem til å gå på likevel!) Vegkryssing kan skje på fotgjengarfelt ved rundkøyring – slik me kjenner det mange stader. Farten er redusert, oversikta er god.

Ein unngår innløysing av 6 av 7 bustadhus, og bevarer både tun, kulturhistorie og busetnad.

Fylkeskommunen sine argument mot rundkøyring framstår for underteikna som både vage og underlege:

«Det er ikkje kultur for rundkøyring på denne vegstrekka.» Kva med rundkøyring i Samnanger, Norheimsund, Øystese? Og tusentals andre stader i vårt land?

«Ei rundkøyring kan ikkje ha vegar av ulik vegklasse knytt til seg.» Dette kan ikkje stemma? Rundkøyringane både i Øystese, Norheimsund og mange andre stader har vegar av ulik vegklasse knytt til seg.

Det er Kvam heradsstyre som skal vedta reguleringsplanen for dette arbeidet. Eg set mi lit til at eit oppegåande og djervt heradsstyre tek omsyn til dei mange og store inngrep som det tilrådde alternativet fører med seg.