Travel og kjekk haust for Norheimsund skulemusikklag

Synnøve Ones Rosales

Norheimsund skulemusikklag har dei siste åra hatt god vekst i medlemstalet, og har no over 70 musikantar fordelte på hovudkorps, juniorkorps og aspirantar. Medlemene er i alderen 7 til 19 år og møtest 1–2 gonger i veka i ulike grupperingar for å øva og ha det kjekt i lag. Korpset er under kyndig, inspirerande og motiverande musikalsk leiing av dirigent Viljar Bjørsvik Rath og eldsjel Anne-Beth Hansen, og ein del musikantar får også timar gjennom kulturskulen. Gjennom skulemusikken opplever born og unge speleglede, meistring og eit inkluderande miljø der alle kan finna sin plass og kjenna at dei høyrer til.

Korpset har hatt ein travel og kjekk haust med øvingar og helgeseminar, men med to klare høgdepunkt. I haustferien reiste 29 musikantar og 23 vaksne på tur til Gardasjøen i Italia. Dei 29 musikantane inkluderte eit fulltalig hovudkorps og ein god gjeng frå juniorkorpset som ganske snart skal over i hovudkorpset. Turen fungerte såleis som ein arena der erfarne og nyare musikantar kunne verta betre kjende og tryggare på å spela i lag. Han gav også eit fint høve for vaksne i apparatet rundt musikantane til å verta betre kjende og ha det hyggeleg saman.

I løpet av dei fem dagane me var i Italia, spelte korpset to konsertar. Den første var eit samarbeid med eit italiensk skulemusikklag i Sona like utanfor Verona, og den andre ein utekonsert ved rådhuset i Garda. Programmet var sett saman av underhaldningsmusikk med m.a. «Månemannen» av Vamp. Denne viste seg å vera svært populær mellom dei overraskande mange som møtte opp som publikum, og måtte spelast om att som ekstranummer på begge konsertane! Spesielt moro var det å spela saman med og verta kjende med unge skulemusikantar i Sona og læra om skilnadane mellom korpsa og vilkåra me driv under. Turen var vellukka på alle vis, og svært verdifull for samhaldet i Norheimsund skulemusikklag.

Laurdag 16. november deltok både aspirantar, junior- og hovudkorps på den 25. utgåva av Mangerfestivalen. Begge korpsa kapra ein andreplass i sine klassar og fekk svært gode tilbakemeldingar frå dommarane. Aspirantane deltok på seminar i regi av Manger folkehøgskule, og viste fram kva dei hadde lært på festkonsert om kvelden saman med eit av dei beste brassbanda i Noreg, Manger musikklag. Også deltaking på Mangerfestivalen var ei svært verdifull felles oppleving for musikantane. Det har styrkt samhaldet i korpset på tvers av alder og nivå endå meir, og har motivert til øving og musikalsk utvikling. I tillegg vart også turen til Manger ei hyggeleg oppleving for foreldre, og korpset er glade for at så mange vaksne vart med denne dagen for å støtta opp om musikantane sine og korpset som heilskap!

Neste punkt på programmet for Norheimsund skulemusikklag er speling på julegateopning i Norheimsund og deltaking på julekonsert i kyrkja saman med Norheimsund musikklag. Til våren ventar meir øving, meir moro og ein stor konsert med ABBA-musikk.