Takk te dokk

«Så kom vintergleda» er oppslaget i HF 7. januar, og i avisa kan me lesa om skiglede på Åse, skientusiast Knut Johan Tveitane på Haukås og Eikedalen Skisenter. Og ja, det er ei sann glede å få nytta dei flotte løypene me har i kommunen vår, på Haukås, Åse og Sjusete. Det er strålande forhold, så lenge det varer, og det er ei sann glede å komma ut i den vakre naturen me har rundt oss i Kvam. Det er òg ei sann glede å sjå alle foreldra som får med ungane ut i snøen. Eg vil gjera som Prudence gjorde i 1975, dei spelte jo i Ungdomshallen på den tida òg, og seia «Takk til dokk». Med dokk meiner eg alle som legg ned dugnadstimar til løypekøyring og anna, alle som brøyter vegane fram til anlegga, Kvam herad og alle sponsorane som støttar anlegga.