Takk for engasjementet

I HF 28. juli kjem dei lokale næringslivsorganisasjonane i Kvam med ei klar tilbakemelding om kva dei ikkje ynskjer som framtidig løysing for Tokagjelet. Dei vil ikkje ha ein tunnel som går til Samnanger. Dette er eit viktig innspel me sjølvsagt tek med oss vidare i debatten fram mot eit politisk vedtak i haust. Me set stor pris på at næringsråd og -lag har prioritert å arbeide fram ein klar og eintydig uttale i denne viktige saka.

I HF 17. juli vart me utfordra på kva me meiner om Tokagjelet og tunnel til Samnanger. I valprogrammet vårt står det klart at me vil arbeida for «flatast mogleg veg mot Bergen», men som det står i artikkelen, vil ikkje fylkeskommunen støtta ein lang tunnel til Samnanger. Derfor er tunnel til Samnanger ikkje lagt fram som eit alternativ no. Me vert òg utfordra på kva me tenkjer om alle arbeidsplassane i Kvam, som er avhengige av Kvamskogen. Kvam Frp er opptekne av at alle i Kvam skal ha ei funksjonell og god løysing forbi Tokagjelet. Det gjeld sjølvsagt òg alle dei som, direkte eller indirekte, har sitt arbeid på Kvamskogen.

Når Kvam Frp oppmodar om at me må stå saman i denne viktige saka, har det sitt utspring i den store utfordringa med finansiering. Dette gjeld alle alternativa, bortsett frå 0- alternativet.

Framlegget til kommunedelplanen for Tokagjelet kom endeleg attende til heradet i siste halvdel av juni 2020. Svært få har hatt tid til å setja seg godt nok inn i innstillinga. Det vil me i Kvam Frp gjera før me tek diskusjonen når saka skal opp til politisk handsaming i Kvam heradsstyre, vonleg i nær framtid.

Kvam Frp vil takka for det store engasjementet næringslivet viser i denne viktige saka. Me vil samtidig oppmoda næringslivet i heradet til å arbeida vidare, både oppover i næringslivsorganisasjonane og å samla ei brei støtte i næringslivet i heile Hardanger, for å løfta utfordringa med finansiering av endeleg løysing i Tokagjelet.

Gunnar Kvandal, leiar i Kvam Frp

Frode Nygård, Gruppeleiar i Kvam Frp